ئەمرۆ ٥ی ئەیلولی ٢٠٢١ شاناز ئیبراھیم ئەحمەد کارگێڕی مەکتەبی سیاسی یەکێتیی نیشتمانیی کوردستان و سەرپەرشتیاری مەڵبەندی یەکی رێکخستنی سلێمانی لەگەڵ ئەنجومەنی زانکۆی پۆلیتەکنیکی سلێمانی کۆبووەوە و بارودۆخی ناوەندەکانی خوێندنی باڵا و چارەنوسی پرۆسەی خوێندن لەناوەندە زانستی و ئەکادیمییەکاندا تاوتوێ کرد.


لەدیدارەکەدا، د.ئالان فەرەیدون سەرۆکی زانکۆی پۆلیتەکنیکی سلێمانی بەناوی ئەنجومەنی زانکۆ و مامۆستا و فەرمانبەران و خوێندکارانەوە لەگەڵ پێشکەشکردنی چەپکە گوڵی پیرۆزبایی، سوپاسی ھەوڵەکانی شاناز ئیبراھیم ئەحمەدی کرد، کە بەردەوام لەخەمی پێشکەوتن و چارەسەرکردنی کێشە و کەموکورتیەکانی ناوەندەکانی خوێندنی باڵادایە و لەم ڕووەوە بەردەوام لەپەیوەندیدابوە و ھیچ درێغییەکی نەکردوە.


لای خۆیەوە ئیبراھیم ئەحمەد، کورتەباسێکی لەسەر بارودۆخی سیاسی و ئابووری ئەم قۆناغە بەگشتیی و پرۆسەی خوێندن و ئاستەنگەکانی بەتایبەت پێشکەشکرد، لەو ڕووانەشەوە سیاسەتی یەکێتیی نیشتمانیی کوردستانی روونکردەوە بۆ تێپەڕاندن و چارەسەرکردنی کێشەکان و ھاوکاریکردنی ناوەندە زانستیی و ئەکادیمییەکان، و پلان و چۆنێتی وەلانانی لەمپەرەکانی بەردەم دەستپێکردنی پرۆسەی خوێندن.

شاناز ئیبراھیم ئەحمەد ستایشی خۆڕاگریی مامۆستایان و فەرمانبەرانی زانکۆکەکەی کرد کە پەرۆش و بەردەوامبوون لەجێبەجێکردنی ئەرکەکانیان بۆ پێگەیاندنی نەوەیەکی گۆشکراو بە زانست و زانیاری سەردەم لە سێکتەر و پسپۆڕییە جیاجیاکاندا.

دواتر و لەگفتوگۆیەکدا سەرۆک و  ئەندامانی ئەنجومەنی زانکۆی پۆلیتەکنیکی سلێمانی کێشەکانی زانکۆکەیان و سەرنج و پێشنیازەکانیان خستەڕوو، بەمەبەستی چارەسەرکردن و پێشخستنی ئاستی زانستی لەزانکۆکەدا، لای خۆشیەوە، شاناز ئیبراھیم ئەحمەد لەگەڵ خستنەڕووی پلان و پێشنیازی لۆژیکی بۆچارەسەری بنەڕەتی کێشەی زانکۆ حکومییەکان، پشتیوانی خۆی بۆ داواکانیان و چارەسەرکردنی کێشەکانیان دووپاتکردەوە.