رۆژنامەنوس و پێشكاری تەلەڤیزیۆنی وریا حەمە كەریم بەرەبەیانی ئەمڕۆ لە روداوێكی هاتوچۆ گیانی لەدەستدا.

پەیامنێری كوردسات نیوز رایگەیاند، وریا حەمەكەریم بەرەبەیانی ئەمڕۆ  لەسەر رێگای عەربەت – سلێمانی توشی روداوی هاتوچۆ بوە و بەهۆی قورسیی راوداوەكەوە گیانی لەدەستداوە.

بە پێی زانیارییەكان بارهەڵگرێك لەسەر رێگای عەربەت - سلێمانی دوای لەدەستدانی كۆنتڕۆڵ خۆی كێشاوە بە دوو ئۆتۆمبێلدا و بەو هۆیەوە رۆژنامەنوس و پێشكەشكار وریا حەمەكەریم گیانی لەدەستداوە.

پۆلیسی هاتوچۆی عەربەت رایگەیاندوە: ئەو رۆژنامەنوسە ئۆتۆمبێلەكەی وەستاندوە و ویستویەتی هاوكاریی شۆفێرێكی دیكە بكات، لەو كاتە بارهەڵگرێك خۆی بە ئۆتۆمبێلی هەردووكیاندا كێشاوە و لە ئەنجامدا وریا حەمەكەریم و شۆفێرەكەی تریش گیانیان لەدەستداوە.

 

سەرۆكی فەڕەنسا لە پەیوەندییەكەی تەلەفۆنیدا لەگەڵ ئەحمەد شەرع، پشتیوانیی وڵاتەكەی بۆ دیمەشق و  هەسەدە راگەیاند.

ئاژانسی هەواڵی فڕانس پرێس بڵاویكردەوە؛ ئیمانۆێل ماكرۆن سەرۆكی فەڕەنسا لە پەیوەندییەكی تەلەفۆنیدا لەگەڵ ئەحمەد شەرع سەرۆكی كاتی دەسەڵاتی راگوزەری سوریا، پشتیوانیی پاریسی بۆ حكومەتی راگوزەری دیمەشق و ئاسایشی وڵاتەكە دەڕبڕیوە.

ماكرۆن لەو پەیوەندییە تەلەفۆنییەكەدا هاوكات لەگەڵ پیرۆزبایی لە گەلی سوریا لەبارەی رزگاربونیان لە دەسەڵاتی رژێمی پێشوو، جەختی كردوەتەوە لەسەر بەرەنگاربونەوەی تیرۆر و جەنگ  لەی دژی داعش.

سەرۆكی فەڕەنسا پشتیوانیی وڵاتەكەی بۆ هێزەكانی سوریای دیموكرات هەسەدە دەڕبڕیوە و رایگەیاندوە، پێویستە ئەو هێزە ببێتە پەشێك لە پێكهاتەی سوپای وڵاتەكە.

سەرۆكایەتی فەڕەنسا لە  راگەیەنراوێكدا ئاشكرایكردووە، پەیوەندییە تەلەفۆنییەكەی ماكرۆن و شەرع ئامادەكارییە بۆ كۆنفڕانسی ئاشتی بۆ سوریا كە بڕیارە لە 13 مانگ  لە پاریسی پایتەخت بەڕێوەبچێت.

 

سەرۆککۆماری عیراق د.لەتیف جەمال ڕەشید، ئەمڕۆ چوارشەممە لەگەڵ سەید عەمار حەکیم سەرۆکی ڕەوتی حیکمەی نیشتمانی کۆبووەوە و بارودۆخی گشتی وڵات و پێشهاتە ناوچەیی و نێودەوڵەتییەکانیان تاوتووێکرد.

لە میانی دیدارەکەدا جەخت لە پاراستنی سەروەری خاکی عیراق کرایەوە لە ناو گۆڕانکارییە ناوچەیی و ئەو ئاڵەنگارییە نێودەوڵەتییانەی کە ڕووبەڕووی وڵات دەبنەوە.

تیشک خرایە سەر، پێویستی یەکخستنی هەوڵ و دیدگا و کاری هاوبەشی نێوان هێزە سیاسییەکان بۆ بەهێزکردنی پرۆسەی دیموکراسی و رووبەڕووبوونەوەی ئەو ئاڵەنگارییانەی کە رووبەڕووی وڵات دەبنەوە.

هەر لەو دیدارەدا جەخت لەسەر پێویستی پابەندبوون بە دەستوور و یاسا لە پێناو پاراستنی سەقامگیری ئەمنی و سیاسی و خزمەتکردنی خەڵک و بەدیهێنانی دادپەروەری کرایەوە.