بەشی پێشبینی لە بەڕێوەبەرایەتیی گشتیی کەشناسیی و بومەلەرزەزانی هۆشداریدا، کە باران بارین زۆربەی ناوچەکانی هەرێمی کوردستان دەگرێتەوە.

بەپێی راگەیەندراوێک کە ئەمڕۆ هەینی، بڵاوکراوەتەوە، ئاسمانی هەرێم لە سەرەتای رۆژدا پەڵە هەور بۆ نیمچە هەور دەبێت و لەشەودا دەگۆڕێت بۆ هەوری تەواو.

کەشناسی هەرێم رونی کردۆتەوە کە لە ئێوارەی ئەمڕۆدا نمە باران و بارانی مامناوەند لە سنوری ئیدارەی گەرمیان و پارێزگای هەڵەبجە دەست پێدەکات و بەرەبەرە کاریگەرییەکەی زیاد دەکات. لە درەنگانی شەودا، باران بارین زۆربەی ناوچەکانی هەرێم دەگرێتەوە و هەندێک کات بە خوڕ دەبارێت و هەورە تریشقەشی لەگەڵ دەبێت.

لە درێژەی راگەیەندراوەکەدا هاتووە، پێشبینی دەکرێت رۆژی شەممە کەش سەقامگیر بێت و کاریگەری ئەم شەپۆلە بارانە کۆتایی پێ بێت.

بەرزترین پلەکانی گەرمای پێشبینیکراو بە پلەی سیلیزی:

- هەولێر:23 پلە
- سلێمانی: 20 پلە
- دهۆک: 20 پلە
- کەرکوک: 25 پلە
- زاخۆ: 20پلە
- هەڵەبجە: 19پلە
- سۆران: 16 پلە
- حاجی ئۆمەران: 9 پلە
- گەرمیان: 23 پلەی سیلیزی

ئۆزگور ئۆزال، سەرۆكی گشتی پارتی گەلی كۆماری (جەهەپە)، داوای لە رەجەب تەیب ئەردۆغان، سەرۆك كۆماری توركیا كردووە كە هەڵبژاردنی پێشوەختی لە وڵاتەكەدا ئەنجام بدات.

ئۆزال پێشنیازی كردووە كە ئەم هەڵبژاردنە پێشوەختە لە مانگی ئەیلول یان تشرینی یەكەمی ساڵی جاری ئەنجام بدرێت.

سەرۆكی جەهەپە لە لێدوانێكی تایبەتدا بۆ كوردسات نیوز جەختی لەوە كردۆتەوە كە ئەگەر پارتەكەی لە هەڵبژاردنی داهاتوودا بدۆڕێت، ئەوا بەڵێن دەدات دەست لە كاری سیاسی هەڵبگرێت و لە گۆڕەپانی سیاسی وڵاتەكەی بكشێتەوە.

شایانی باسە، ئەم داوایەی سەرۆكی جەهەپە دوای ئەوە دێت كە لە 19ـی ئاداری ئەمساڵدا، ئەكرەم ئیمام ئۆغلو، سەرۆكی شارەوانی ئیستەنبوڵ و كاندیدی جەهەپە بۆ پۆستی سەرۆك كۆماری توركیا، لەلایەن دەسەڵاتدارانی وڵاتەكەوە دەستگیركرا.

بەیانی ئەمڕۆ هەینی، لە ئەژماری ئەکرەم ئیمامئۆغلو لە ئێکس،  بڵاوکرایەوە؛ "دەڵێین واز لەم نادادپەروەرییە بێنن، کە رەنگە ڕۆژێک لە دەرگای هەر کەسێک بدات، لە پێناو منداڵەکانمان و داهاتوومان. دەبێت بڵێین بەر بەو عەقڵیەتە بگرن کە هەموو ئامرازێک بەکاردەهێنێت بۆ ئەوەی کورسییەکەی بپارێزێت کە هی خۆی نییە."

بەهۆی فشارەكانی ئەمریكاوە، عیراق هەڕەشەی لەدەستدانی 40%ی وزەی كارەبای بۆ وەرزی هاوین لەسەرە.

ئەنجومەنی ئەتڵەسی كە بارەگاكەی لە واشنتۆنە، لە راپۆرتێكدا هۆشداری داوە كە عیراق نزیكە لەوەی 40%ی كۆی توانای كارەبای لەدەست بدات، ئەوەش لەئەنجامی گۆڕانی سیاسەتەكانی ئەمریكا بەرامبەر ئێران، لەكاتێكدا وەرزی هاوین لە چەند هەفتەی داهاتوودا تەنگ بە عیراقییەكان هەڵدەچنێت.

بەپێی راپۆرتەكە، عیراق پشت بە ئێران دەبەستێت بۆ دەستەبەركردنی 40%ی پێداویستییەكانی كارەبا، لە رێگەی غازەوە بۆ وێستگەكانی بەرهەمهێنانی كارەبا یان لە رێگەی هاوردەكردنی راستەوخۆی كارەباوە بێت، هۆشداریشیداوە ئەو رێژەیە مەترسی نەمانی لە هاوینی ئەمساڵدا هەیە.

ئێران رۆژانە نزیكەی 50 ملیۆن پێ سێجا غاز بۆ عیراق دابین دەكات كە نزیكەی یەك لەسەر سێی پێداویستی عیراق لەخۆدەگرێت و نزیكەی 8 هەزار مێگاوات كارەبای لێ بەرهەمدەهێنرێت.