فەرماندەی گشتی هێزەکانی سوریای دیموکرات (هەسەدە) دەڵێت: "ئەگەر ئاشتی لە تورکیا بەدیهات، هیچ پاساوێک نامێنێت بۆ هێرشکردنە سەر ناوچەکانمان لە سوریا"

مەزلوم کۆبانێ، فەرماندەی گشتی هێزەکانی سوریای دیموکرات (هەسەدە)، لەبارەی پەیامەکەی ئۆجەلانەوە، بۆ هەڵوەشاندنەوەی پارتی کرێکارانی کوردستان (پەکەکە) و دانانی چەک، رایگەیاند: تەنیا پەیوەندی بە پەکەکەوە هەیە و هیچ پەیوەندییەکی بە هێزەکانی سوریای دیموکراتەوە نییە.

بەپێی ڕاپۆرتێکی ئاژانسی ڕۆیتەرز، عەبدی رایگەیاندووە: "ئۆجەلان پەیامی لەبارەی راگەیاندنەکەیەوە بۆ ناردبووین، ئەو راگەیاندنەش ئەرێنی بووە و جەختی لەسەر ئاشتی و ئاسایشی ناوچەکە کردووەتەوە."

فەرماندەی گشتی هەسەدە هەروەها روونیکردەوە بۆچی راگەیاندنەکەی ئۆجەلانی بە "ئەرێنی" وەسفکردووە: "چونکە داوای کۆتاییهێنان بە شەڕ و دەستپێکردنی پرۆسەی سیاسیی ئاشتیانە لە ناوخۆی تورکیا دەکات."

لە بەشێکی دیکەی لێدوانەکەیدا، عەبدی جەختی کردەوە: "ئەگەر ئاشتی لە تورکیا بەدیهات، ئەمە مانای ئەوەیە هیچ پاساوێک نییە بۆ بەردەوامبوونی هێرشەکان بۆ سەر ئێمە لێرە لە سوریا."

جێی باسە، ئەمڕۆ پێنجشەممە، عەبدوڵا ئۆجەلان لە وتارێکدا کە لەلایەن دەم پارتی ەوە خوێندرایەوە، داوای لە پارتی کرێکارانی کوردستان کرد کۆنگرەیەکی گشتی سازبکات و بڕیاری هەڵوەشاندنەوەی خۆی بدات. ئۆجەلان جەختیشی لەوە کردەوە کە بەرپرسیارێتی مێژوویی ئەم بانگەوازە هەڵدەگرێت.

لە پەیامەکەی ئۆجەلاندا هاتبوو: "هیچ رێگایەک جگە لە دیموکراسی و دیالۆگی دیموکراسی نییە. زمانی ئەم سەردەمە ئاشتییە و کۆمەڵگەی دیموکراسی پێویستی بە گەشەپێدان هەیە."

شایانی باسە، ئەم بانگەوازەی ئۆجەلان کاردانەوەی جۆراوجۆری لێکەوتووەتەوە لە ناوچەکە و چاودێران وەک هەنگاوێکی گرنگ و مێژوویی لە پرسی کورد لە تورکیا دەیبینن.