بەیاننامەی كۆتایی كۆنفرانسی دیالۆگی نیشتمانیی سوریا بڵاوكرایەوە
لاوان
٢٥ی شوباتی ٢٠٢٥
كۆنفرانسی دیالۆگی نیشتمانی سوریا بە سەرپەرشتی ئەحمەد شەرع سەرۆكی سوریا لە دیمەشق بەڕێوەچوو و تیایدا داوای نووسینەوەی دەستوور و ئەنجومەنێكی یاسادانانی كاتی كرا، كە لەگەڵ هەلومەرجەكانی قۆناغی راگوزەری لە سوریا بگونجێت.
هەروەها، كۆنفرانسەكە ئاماژەی بە پێویستی رێزگرتن لە مافەكانی مرۆڤ و پاڵپشتیكردن لە رۆڵی ژنان لەسەرجەم بوارەكان دا و جەختیكردەوە لەسەر پاراستنی مافی منداڵان و گرنگیدان بە كەسانی خاوەن پێداویستی تایبەت و چالاككردنی رۆڵی لە گەنجان لە دەوڵەتدا.
لە بەیاننامەكەدا، جەختیشیكراوەتەوە لە بەرەوپێشبردنی ئازادی لە كۆمەڵگە و چەسپاندنی پرەنسیپی پێكەوە ژیانی ئاشتییانەی نێوان سەرجەم پێكهاتەكانی سوریا، هەموو جۆرەكانی توندوتیژی و هاندان بۆ تۆڵەسەندەوەش، لە بەیاننامەكەدا رەتكراوەتەوە.
لە كۆتایی بەیاننامەكەدا، تەئکیدکرایەوە لە پاراستنی یەكڕیزی و سەروەری سوریا و هەموو جۆرە دابەشبوونێكی خاكی وڵاتەكە رەتكراوەتەوە، هاوكات داوای دەستبەجێ كشانەوەی ئیسرائیل لە سوریا بەبێ مەرج كراوە، داواش لە كۆمەڵگەی نێودەوڵەتی كراوە فشار و پێشێلكارییەكان لەسەر گەلی سوریا رابگرن.