پۆلیسی فریاکەوتنی کەرکوک کەیسی ئەشکەنجەدانی منداڵێکی تەمەن 12 ساڵان تایبەت بە کوردسات نیوز ئاشکرا دەکات، و چیرۆکی ئاشکرابوونی کەیسەکە بۆ کوردسات نیوز دەگێڕێتەوە.

سەرچاوەیەکی تایبەت لە پۆلیسی فریاکەوتنی کەرکوک لە لێدوانێکیدا بۆ کوردسات نیوز ئاشکرای کرد کە لە دوای ئەوەی لە یەکێک لە گەڕانەکانیاندا منداڵێکیان بینیوە لەسەر شەقام کە بەردەوام خەریکی خوراندنی جەستەی بووە، لێی نزیک بوونەتەوە و دواتر بۆیان دەرکەوتووە هەموو لەشی بە جگەرە، چەقۆ و سۆندە، بریندار کراوە و بەر ئەشکەنجەیەکی زۆر کەوتووە.

بەپێی لێکۆڵینەوەکانی پۆلیس، ئەو منداڵە کە ناوی "ئەمجەد"ە و سەر بە نەتەوەی عەرەبە، دوای ئەوەی دایکی هاوسەرگیری لەگەڵ پیاوێکی تر کردووە، زڕباوکی بەزۆر ناردوویەتیە سەر شەقام بۆ کارکردن و سواڵکردن. سەرچاوەکە ئاشکرای کرد، کە "هەر رۆژێک بڕە پارەیەکی باشی پەیدا نەکردبێت، ئەشکەنجە و ئازارێکی زۆر دراوە".

هەر بەپێی ئەو سەرچاوەیە کە تایبەت بە کوردسات نیوز دووا، منداڵەکە راستەوخۆ گواستراوەتەوە بۆ بەشی توندوتیژی خێزانی و لەلایەن دادوەرەوە فەرمانی دەستگیرکردن بۆ خێزانی منداڵەکە دەرچووە.

شایەنی باسە، ئەمە یەکەمین کەیس نییە لەو جۆرە کە لە پارێزگای کەرکوک تۆمار دەکرێت. بەپێی ئامارەکانی رێکخراوەکانی مافی مرۆڤ، لە ماوەی ساڵی رابردوودا، دەیان کەیسی توندوتیژی دژی منداڵان لە کەرکوک تۆمار کراوە.

پێشتر، بەڕێوەبەرایەتی پۆلیسی کەرکوک رایگەیاندبوو کە هەڵمەتێکی فراوانیان دەست پێکردووە بۆ بەرەنگاربوونەوەی دیاردەی توندوتیژی دژی منداڵان و کارپێکردنیان بەشێوەیەکی نایاسایی.