لیواکانی عیزەددین ئەلقەسام، باڵی سەربازی بزوتنەوەی حەماس، گرتەیەکی ڤیدیۆیی نوێیان بڵاوکردۆتەوە کە تێیدا دوو بارمتەی ئیسرائیلی دەردەکەون و داوای راگرتنی هێرشەکانی ئیسرائیل بۆ سەر کەرتی غەززە دەکەن.

بەپێی زانیارییەکان، لەو گرتە ڤیدیۆییەدا، بارمتەکان کە لەلایەن لیواکانی قەسامەوە دەستبەسەر کراون، جەخت لەوە دەکەنەوە کە ژیانیان لە مەترسیدایە بەهۆی بۆردومانە بەردەوامەکانی سوپای ئیسرائیلەوە. ئەوان رایانگەیاندووە کە ئەمڕۆ کاتێک لە تونێلەکان دەرچوون بۆ وەرگرتنی کەمێک هەوا، راستەوخۆ بەر تۆپبارانی سوپای ئیسرائیل کەوتوون.

بارمتەکان لە پەیامێکی راستەوخۆدا بۆ حکومەتەکەیان ئاماژەیان بەوە کردووە کە "شوێنی راگیرانمان سەلامەت نییە و هیچ خواردن و خواردنەوە و پێداویستییەکی خەوتنی تێدا نییە" و زیاتر جەختیان کردوەتەوە کە "چەکدارانی حەماس ژیانی خۆیان دەخەنە مەترسییەوە تەنها بۆ ئەوەی ئێمە بتوانین لە دەرەوەی تونێلەکان هەناسە بدەین، لەکاتێکدا سوپای وڵاتەکەمان بەردەوام بۆردومانمان دەکات".

لە کۆتایی ڤیدیۆکەدا، بارمتەکان داوایان لە هاووڵاتیانی ئیسرائیلی کردووە فشار بخەنە سەر سەرۆک وەزیران بنیامین ناتانیاهۆ بۆ گەیشتن بە رێککەوتنێک کە بتوانن بە زیندوویی بگەڕێنەوە بۆ ماڵ و خێزانەکانیان. بە دەنگێکی لاوازەوە ئەو دوو بارمتەیە وتیان: "زیندومان بکەنەوە، ئێمە لێرە مردوین".

لیواکانی قەسام لەگەڵ بڵاوکردنەوەی ئەم ڤیدیۆیەدا هۆشداریان داوە کە "کات بەخێرایی تێدەپەڕێت" و ئەگەر داواکارییەکانیان جێبەجێ نەکرێت، ئەوا "چارەنوسی بارمتەکان نادیار دەبێت".