پیت هایگسێت، وەزیری بەرگری ئەمریکا لە پەیوەندییەکی تەلەفۆنیدا بە محەمەد شیاع سودانی، سەرۆک وەزیرانی عێراقی راگەیاند، کە ئەمریکا بەردەوام دەبێت لە هێرشەکانی لە یەمەن و دەریای ناوەڕاست، هەتا حوسییەکان هێرشەکانیان رادەگرن.

نوسینگەی سودانی بڵاویکردەوە، وەزیری بەرگری ئەمریکا پەیوەندی بە محەمەد شیاع سودانییەوە کرد و پێکەوە باسیان لە ئاسایشی ناوچەکە و سەرکەوتنەکانی ئەمدواییە کردەوە لە کوشتنی تیرۆریستان، هایگسێت لە پەیوەندییە تەلەفۆنییەکەیدا لەگەڵ سودانی رونی کردەوە؛ واشنتۆن لەگەڵ پەرەسەندنی گرژییەکاندا نییە و هەر کە هێرشەکانی حوسییەکان وەستان، ئۆپەراسیۆنەکانمان دەوەستن.

لە وەڵامدا محەمەد شیاع سودانی رایگەیاندووە؛ عیراق پابەندە بە کۆنتڕۆڵکردنی دەسەڵاتی هێز و پاراستنی هاوبەشەکانی لە عیراق و جەختی کردەوە، کە دیالۆگ و هاوبەشی زیاتری نێوانیان رێگایەکی گرنگە بۆ چارەسەرکردنی پرسی تیرۆر.

لە کۆتاییدا، هەردوولا جەختیان لە گرنگی بەردەوامی گفتوگۆ و هاوکاری بۆ پێشخستنی بەرژەوەندییە هاوبەشەکانی نێوان عیراق و ئەمریکا کردەوە، بۆ پێکەوە کارکردن بۆ پاراستنی ئارامی و ئاسایشی ناوچەکە.