سەرۆکی دەزگای گشتی کاروباری مین داوا لە هاووڵاتیان دەکات، ئاگاداری خۆیان بن بۆئەوەی نەبنە قوربانیی روداوی تەقینەوەی مین. دەشڵێت: ساڵانە زۆرینەی ئاماری تەقینەوەی مین بە هاووڵاتیاندا بەهۆی چوونە بۆ گژوگیای بەهارە.
جەبار مستەفا رەسوڵ سەرۆکی گشتی دەزگای کاروباری مین داوا لە هاووڵاتیان دەکەن، بۆ کۆکردنەوەی گژوگیای بەهارە روو لە ناوچە مەترسیدارەکان نەکەن و گیانی خۆیان نەخەنە مەترسییەوە.
ئاماژەی بەوەشکردووە، دەزگاکە رۆژانە لە رێگەی تیمەکانەوە بەو توانایەی هەیە بەردەوامە لە پاککردنەوەی ناوچە پیسبووەکان بە مین.
دەشڵێت، "بەهۆی زۆری رووبەری پیسبوو و تەقەمەنی نەتوانراوە سەرجەم کێڵگە مینەکان پاک بکرێنەوە، بۆیە داواتان لێدەکەم خۆتان مەکەنە قوربانیی گژوگیای بەهارە".
ئەوەشی خستووەتە روو، بەپێی ئاماری ساڵانەی دەزگاکە زۆرینەی قوربانیانی مین و تەقەمەنی، پەیڕەونەکردنی رێنماییەکانە لەلایەن هاوڵاتیانەوە، لەکاتی نزیکبوونەوەیان لە ناوچە مەترسیدارەکان بۆ کۆکردنەوەی گژوگیای بەهارە.
ئەوەش لەکاتێکدایە، ساڵانە لە وەرزی بەهاردا بەشێکی هاووڵاتیانی کوردستان بە مەبەستی کۆکردنەوەی گژوگیا بەهارەییەکان روو دەکەنە شاخە بەرزەکان. بەهۆی بوونی مین لەو ناوچانە و شارەزانەبوونی بەشێکی هاووڵاتییەکانیش لەبارەی ئەو ناوچانەوە، مینیان پێدا دەتەقێتەوە و بەهۆیەوە تاوەکو ئێستا چەندین روداوی گیانلەدەستدان و برینداربوون یان کەمئەندام بوون رویانداوە.
بەیانی ئەمڕۆش، بەهۆی تەقینەوەی مینەوە لە کوێستانەکانی برادۆست، گەنجێک بەناوی محەمەد هەینی تەمەن 28 ساڵ گیانی لەدەستدا و برایەکیشی بریندار بوو. کە لە سەرەتای ئەمساڵەوە ئەوە سێیەم روداوی تەقینەوەی مینە لەو سنوورەدا.
هەرێمی کوردستان چەندین ناوچەی مینڕێژکراوی لێیە، کە لە سەردەمی رژێمی پێشووی عیراقدا ئەو مینانە بە مەبەستی کۆنتڕۆڵکردنی ناوچە جیاوازەکانی کوردستان چێنراون، ئەگەرچی 34 ساڵ بەسەر روخانی رژێمی بەعسدا تێپەڕیوە و لەو ماوەیەشدا حکومەتی هەرێم بەردەوامبووە لە پاککردنەوەی ناوچەکان لە مین، بەڵام هێشتا بەشێکی خاکی کوردستان بە تەواوی لە مین پاکنەکراوەتەوە.
