هاکان فیدان، وەزیری دەرەوەی تورکیا ئەمڕۆ هەینی لە پەراوێزی کۆبونەوەی وەزیرانی دەرەوەی ناتۆ لە برۆکسل، رایگەیاند کە وڵاتەکەی نایەوێت هیچ روبەروبونەوەیەکی لەگەڵ ئیسرائیل لە سوریادا هەبێت.

بەپێی لێدوانی فیدان بۆ ئاژانسی رۆیتەرز، "کردەوەکانی ئیسرائیل لە سوریا کە ئیدارەی سەرۆک ئەحمەد شەرع هاوپەیمانێکی نزیکی تورکیایە، رێگا بۆ ناسەقامگیری داهاتوی ناوچەکە خۆش دەکات".

وەزیری دەرەوەی تورکیا داوای کۆتاییهێنان بە هێرشەکانی ئیسرائیلی کرد لەسەر خاکی سوریا.

شایەنی باسە شەوی 2ـی نیسان، سوپای ئیسرائیل هێرشی ئاسمانی بۆ سەر دوو بنکەی ئاسمانی و شوێنی ژێرخانی سەربازی لە شارەکانی دیمەشق، حەمما و حومسی سوریا ئەنجامدا، کە بووە هۆی وێرانکردنی نزیکەی تەواوی فڕۆکەخانەی سەربازی حەمما و برینداربوونی دەیان کەس.

لە دوای روخانی رژێمی ئەسەدەوە، ئیسرائیل دەیان هێرشی بۆ سەر سوریا دەستپێکردووە بۆ لەناوبردنی زۆربەی تواناکانی سوپای سوریا، هێزەکانیشی پێشڕەوییان کردووە بۆ داگیرکردنی شوێنە ستراتیژییەکانی ناو خاکی سوریا.

لەلایەکی دیکەوە، دوێنێ ئیسڕائیل کاتز، وەزیری بەرگری ئیسرائیل لە راگەیەندراوێکدا هۆشداری دا بە ئەحمەد شەرع، سەرۆکی سوریا بۆ قۆناغی راگوزەر، کە بە ناوی "ئەبو محەمەد جۆلانی" قسەی بۆ کرد و رایگەیاند، سوریا "باجێکی قورس دەدات ئەگەر رێگە بە هاتنە ژورەوەی هێزەکانی دوژمنی سوریا بدات"

وتەبێژی كۆمیسیۆنی باڵای هەڵبژاردنەكانی عیراق دەڵێت، پابەندن بە ئەنجامدانی هەڵبژاردن لە وادەی خۆیدا، لە رێگەی هەزار و 79 ناوەندی تۆماریشەوە پێشوازی لە دەنگدەران دەكەن.

جومانە غەلای وتەبێژی كۆمیسیۆنی باڵای سەربەخۆی هەڵبژاردنەكانی عیراق، پابەندبوونی دەستووری و یاسایی كۆمیسیۆنی بە ئەنجامدانی هەڵبژاردن لە وادەی دیاریكراودا راگەیاند و ئاماژەی بۆ ئەوەشكرد، لە رێگەی هەزار و 79 ناوەندی تۆماركردنەوە لە سەرتاسەری عیراق پێشوازی لە دەنگدەران دەكەن، تیمی گەڕۆكیش رەوانەی دەزگا و فەرمانگەكانی حكومەت دەكەن بۆ هۆشیاركردنەوە لەبارەی گرنگی نوێكردنەوەی تۆماری دەنگدەران.

راشیگەیاندوە، لەئێستادا كۆمیسیۆن كاردەكات بۆ نۆژەنكردنەوە و ئامادەكردن و پاراستنی ئامێرەكانی هەڵبژاردن و تۆماركردنی دەنگدەری نوێ و راستكردنەوەی داتاكان و سڕینەوەی ناوی مردوو، بە مەبەستی دڵنیابوون لە بەڕێوەبردنی پرۆسەكە.

بەپێی راپۆرتی ئاژانسی هەواڵی سانا، ئەمڕۆ هەینی، یەکەم کاروانی سەربازیی هێزەکانی سوریای دیموکرات (هەسەدە) لە پارێزگای حەلەب دەستی بە کشانەوە کرد بەرەو رۆژهەڵاتی فورات.

سەرچاوەکان ئاماژەیان بەوە کردووە کە کاروانە سەربازییەکە بەسەرپەرشتی وەزارەتی بەرگریی سوریا کشاوەتەوە لە ناوچەکە.

شایەنی باسە، دوێنێ پێنجشەممە 3ـی نیسان، روانگەی سوری بۆ مافی مرۆڤ رایگەیاند کە 100 دیلی دەستی هێزەکانی سوریای دیموکرات (هەسەدە) و150 دیلی دەستی رژێمی سوریا بەپێی رێککەوتنی نێوانیان ئاڵوگۆڕیان پێکراوە.

ئەم هەنگاوانە دوای رێککەوتنی مێژویی نێوان ئەحمەد شەرع، سەرۆکی قۆناغی راگوزەری سوریا و مەزڵوم کۆبانێ، فەرماندەی گشتیی هێزەکانی سوریای دیموکرات (هەسەدە) دێت کە لە 10ـی ئاداری 2025 بەڕەسمی راگەیەندرا.

بەپێی ڕاگەیەندراوی سەرۆکایەتیی کۆماری سووریا، رێککەوتنەکە چەندین خاڵی گرنگی لەخۆگرتووە، لەوانە:

- خستنەناوی هەسەدە لە سیستەمی هێزی بەرگریی نیشتمانی سوریا

- گەڕاندنەوەی دەسەڵاتی دامەزراوە مەدەنییەکانی باکوری ڕۆژهەڵاتی سوریا بۆ سەر دیمەشق

- گرتنەوە دەستی کۆنترۆڵی دەروازە سنورییەکان، فڕۆکەخانە و کێڵگەکانی نەوت و غاز لەلایەن حکومەتی ناوەندییەوە.