حوسییەكان رایانگەیاند، هێرشەكانیان بۆسەر ئیسرائیل دەستپێدەكەنەوە، راگرتنی هێرشەكانیان لە ماوەی رابردوودا، بۆ گەیاندنی هاوكاریی بووە بە فەلەستین.

یەحیا سەریع وتەبێژی چەكدارانی حوسی لە یەمەن رایگەیاند، مۆڵەتی چوار رۆژیی هێزەكانیان بۆ راگرتنی هێرشەكانیان دژی ئیسرائیل كۆتایی هاتووە و هێرشەكانیان دەست پێدەكەنەوە.

بە وتەی سەریع راگرتنی هێرشەكانیان دژی ئیسرائیل و كەشتییەكانی ئەو وڵاتە بۆ ئاگربەست لە غەززە و گەیاندنی هاوكاریی بۆ فەلەستنییەكان بووە، بۆیە دوای ئەو وادە دەستنیشانكراوە هێرشی حوسییەكان لە دەریای سور و دەریای عەرەب و بابولمەندەب و كەنداوی عەدەن دەست پێدەكەنەوە.

 

ئاژانسی رۆیتەرز رایگەیاند، سبەینێ رەشنووسی دەستووری سوریا بۆ قۆناغی راگوزەر پێشكەشی ئەحمەد شەرع سەرۆكی سوریا دەكرێت تاكو پەسەندی بكات.

ئاژانسی رۆیتەرز بڵاویكردەوە، ئەو لیژنەیەی راسپێردرابوون بە داڕشتنەوەی دەستوور بۆ قۆناغی راگوزەری سوریا، كارەكانیان تەواوكردووە و سبەینێ رەشنووسی دەستوورەكە پێشكەشی "ئەحمەد شەرع سەرۆكی سوریا" دەكەن، تاكو پەسەندی بكات.

رۆژی 25ـی مانگی شوباتی رابردوو، كۆنفرانسی دیالۆگی نیشتمانی سوریا بە سەرپەرشتی ئەحمەد شەرع لە دیمەشق بەڕێوەچوو، تیایدا چەند راسپاردەیەك دەركران، لەنێویاندا داڕشتنەوەی دەستوور بە جۆرێك لەگەڵ قۆناغی راگوزەری سوریا بگونجێت.

دواتر لە رۆژی 3ـی ئەم مانگە سەرۆكی سوریا، مەرسومێكی كۆماری دەركرد، بۆ دیاریكردنی لیژنەیەك تاكو هەڵسن بە ئەركی داڕشتنەوەی دەستووری سوریا، لیژنەكە لە حەوت ئەندام پێكهاتووە و ژنیش لەناو ئەندامەكاندا هەیە.

كۆمسیۆنی هەڵبژاردنەكانی عیراق رایگەیاند، رۆژی شەممەی داهاتوو نوێكردنەوەی تۆماری بایۆمەتری دەنگدەران دەستپێدەكاتەوە بۆ هەڵبژاردنی داهاتووی ئەنجومەنی نوێنەران، لە دایكبووانی ساڵی 2007 یش مافی دەنگدانیان دەبێت.

كۆمسیۆنی باڵای سەربەخۆی هەڵبژاردنەكانی عیراق بڵاویكردەوە، لە چوارچێوەی ئامادەكارییەكانیان بۆ هەڵبژاردنی داهاتووی ئەنجومەنی نوێنەران، كە بڕیارە كۆتایی ئەمساڵ بكرێت، دەستیانكردووە بە نوێكردنەوەی بەرنامەكانی ئامێری پەنجەمۆر و چارەسەركردنی كێشەی نەخوێندنەوەی پەنجەمۆری دەنگدەران، هاوكات ئەنجامدانی گرێبەستێك لەگەڵ كۆمپانیایەكی پشكنین بۆ پشكنینی ئامێرەكان.

ئەوەشی خستووەتەڕوو، كاردەكەن بە ئاڕاستەی زیادكردنی وێنەی دەنگدەر بۆ سەر كاتی دەنگدان، بۆ كەمكردنەوەی كێشەی نەخوێندنەوەی پەنجەمۆری دەنگدەر.

كۆمسیۆن راشیگەیاندووە، رۆژی شەممەی داهاتوو 15ـی ئەم مانگە، نوێكردنەوەی تۆماری دەنگدەران دەستپێدەكات و لە دایكبووانی ساڵی 2007 یش مافی دەنگدانیان دەبێت و دەتوانن سەردان بكەن بۆ ناو تۆماركردن.