ئەپیكور رایگەیاند، بەپەلەن بۆ دەستپێكردنەوەی هەناردەی نەوتی هەرێم و دەشڵێت، پێویستە رێز لە رێككەوتنەكانیان لەگەڵ حكومەتی هەرێم بگیرێت.

كۆمەڵەی پیشەسازی نەوتی كوردستان - ئەپیكور لە تۆڕی كۆمەڵایەتی ئێكس بڵاویكردەوە، لەگەڵ گەیشتن بە رێككەوتن لەگەڵ هەرێمی كوردستان و عیراق هەناردەی نەوت دەستپێدەكاتەوە و پێویستە رێز لە رێككەوتنەكانیان لەگەڵ حكومەتی هەرێم بگیرێت.

ئاماژەی بەوەش كرد، راگرتنی هەناردەی نەوتی هەرێم لە رێی بۆری عیراق-توركیاوە زیانێكی زۆری بە وەبەرهێنانەكانیان گەیاندووە و ناچار بوون لە خوار نرخی بازاڕی جیهانی نەوت بفرۆشن بەوەش نزیكەی 400 ملیۆن دۆلار زیانیان پێگەشتووە، لەبەر ئەوە داواكارییەكانیان ئاڕاستەی حكومەتی هەرێم و عیراق كردووە، چاوەڕوانیش دەكەن لەگەڵ دەستپێكردنەوەی هەناردەی نەوت وەبەرهێنانیان دەستپێبكاتەوە. 

ئەپیكور جەختیشی كردووەتەوە، دەستپیكردنەوەی هەناردەكردنی نەوت دەبێتە مایەی خۆشگوزەرانی بۆ تەواوی گەلی عیراق.

رۆژنامەی تەلەگرافی بەریتانی لە زاری لێپرسراوێکی باڵای ئێرانی ئاشکرای کردووە کە تاران بڕیاری داوە پاڵپشتی حوسییەکانی یەمەن رابگرێت. ئەم هەنگاوە لە هەوڵێکدایە بۆ دوورکەوتنەوە لە ڕووبەڕووبوونەوەی سەربازی لەگەڵ ئەمریکا.

بەپێی ڕاپۆرتی رۆژنامەکە، لێپرسراوە باڵاکەی ئێران راشیگەیاندووە کە تاران پێداچوونەوە بە سیاسەتەکانی خۆی بەرامبەر بە هێزە بریکارەکانی لە ناوچەکەدا دەکات و بڕیاری داوە هێزە سەربازییەکانی لە یەمەن بکشێنێتەوە.

سەرچاوەکەی تەلەگراف جەختی کردووەتەوە کە ئەم بڕیارەی تاران بە ئامانجی دوورکەوتنەوەیە لە روبەروبوونەوەی سەربازی لەگەڵ ئەمریکا، و لە ئێستادا سەرنجی راستەوخۆی لەسەر کەمکردنەوەی ئەو هەڕەشانەیە کە روبەروی بووەتەوە.

هاوکات، مەسعود پزیشکیان، سەرۆکی ئێران، لە پەیوەندییەکی تەلەفۆنیدا لەگەڵ محەمەد بن سەلمان، جێنشینی پاشای سعودیە، جەختی لەوە کردەوە کە وڵاتەکەی جەنگی لە ناوچەکە ناوێت و ئامادەیە بۆ گفتوگۆ و چارەسەرکردنی کێشەکان بە شێوەیەکی ئاشتیانە.

پزیشکیان هەروەها جەختی لەوە کردەوە کە ئێران مافی خۆیەتی سوود لە وزەی ئەتۆمی ئاشتی وەربگرێت و بەرگری لە بەرژەوەندییەکانی خۆیان دەکەن بەبێ ئەوەی ببێتە هۆکاری ناسەقامگیری لە ناوچەکەدا.

ئەمشەو پێنجشەممە، فڕۆکە جەنگییەکانی ئیسرائیل جارێکی دیکە هێرشیان کردە سەر سوریا و بۆ یەکەمجار لە دوای هاتنەسەر دەسەڵاتی ئەحمەد شەرع، فڕۆکەکانی ئیسرائیل راستەوخۆ چەند پێگەیەکی سوپای ئەو وڵاتەیان کردووەتە ئامانج.

تەلەڤیزیۆنی فەرمی سوریا، بێ ئەوەی زیانەکان ئاشکرا بکات، پشتڕاستی کردەوە کە هەریەکە لە فیرقەی 75 و 91ـی سوپای وڵاتەکە کراونەتە ئامانج و هێرشی چڕی ئاسمانی کراوەتە سەریان.

هەر ئەمڕۆ پێنجشەممە، ئیسرائیل کاتز، وەزیری بەرگری ئیسرائیل لە بەیاننامەیەکدا رایگەیاند: "بۆ بەرەنگاربوونەوەی مەترسییەکان و هەڕەشەکانی سەر ئاسایشی وڵاتەکەمان، هێزەکانی سوپای ئیسرائیل لە ناوچە پارێزراوەکانی ناوخۆی سوریادا دەمێننەوە و هەرکاتێک پێویست بکات، بە توندی وەڵامی هەر مەترسییەک دەدەینەوە."

شایانی باسە، ئەمە یەکەمجار نییە ئیسرائیل سوریا بۆردومان دەکات. لە رابردووشدا بەردەوام ئەو وڵاتەی کردووەتە ئامانج، بەتایبەت ئەو شوێنانەی کە گومانی هەبووە چەکی کیمیاییان تێدا هەڵگیراوە. لە هەندێک حاڵەتیشدا ناوچە مەدەنی و نیشتەجێبوونەکانیش پارێزراو نەبوون، کە ئەمەش بووەتە هۆی دروستبوونی کۆدەنگییەکی نێودەوڵەتی بۆ ئیدانەکردنی هێرشەکانی ئیسرائیل.

درەنگانێکی شەوی چوارشەممەش، فڕۆکەکانی ئیسرائیل گەورەترین فڕۆکەخانەی سەربازیی سوپای پێشووی سوریایان لە دەرعا کردە ئامانج و بەپێی راگەیاندنی دەسەڵاتدارانی شارەکە، لە ئەنجامی هێرشەکەدا زیاتر لە ٩ هاووڵاتی مەدەنی گیانیان لەدەستداوە.