ئەمشەو پێنجشەممە، فڕۆکە جەنگییەکانی ئیسرائیل جارێکی دیکە هێرشیان کردە سەر سوریا و بۆ یەکەمجار لە دوای هاتنەسەر دەسەڵاتی ئەحمەد شەرع، فڕۆکەکانی ئیسرائیل راستەوخۆ چەند پێگەیەکی سوپای ئەو وڵاتەیان کردووەتە ئامانج.
تەلەڤیزیۆنی فەرمی سوریا، بێ ئەوەی زیانەکان ئاشکرا بکات، پشتڕاستی کردەوە کە هەریەکە لە فیرقەی 75 و 91ـی سوپای وڵاتەکە کراونەتە ئامانج و هێرشی چڕی ئاسمانی کراوەتە سەریان.
هەر ئەمڕۆ پێنجشەممە، ئیسرائیل کاتز، وەزیری بەرگری ئیسرائیل لە بەیاننامەیەکدا رایگەیاند: "بۆ بەرەنگاربوونەوەی مەترسییەکان و هەڕەشەکانی سەر ئاسایشی وڵاتەکەمان، هێزەکانی سوپای ئیسرائیل لە ناوچە پارێزراوەکانی ناوخۆی سوریادا دەمێننەوە و هەرکاتێک پێویست بکات، بە توندی وەڵامی هەر مەترسییەک دەدەینەوە."
شایانی باسە، ئەمە یەکەمجار نییە ئیسرائیل سوریا بۆردومان دەکات. لە رابردووشدا بەردەوام ئەو وڵاتەی کردووەتە ئامانج، بەتایبەت ئەو شوێنانەی کە گومانی هەبووە چەکی کیمیاییان تێدا هەڵگیراوە. لە هەندێک حاڵەتیشدا ناوچە مەدەنی و نیشتەجێبوونەکانیش پارێزراو نەبوون، کە ئەمەش بووەتە هۆی دروستبوونی کۆدەنگییەکی نێودەوڵەتی بۆ ئیدانەکردنی هێرشەکانی ئیسرائیل.
درەنگانێکی شەوی چوارشەممەش، فڕۆکەکانی ئیسرائیل گەورەترین فڕۆکەخانەی سەربازیی سوپای پێشووی سوریایان لە دەرعا کردە ئامانج و بەپێی راگەیاندنی دەسەڵاتدارانی شارەکە، لە ئەنجامی هێرشەکەدا زیاتر لە ٩ هاووڵاتی مەدەنی گیانیان لەدەستداوە.
