جاسم حەمادی، وەزیری ژینگەی عێراق بە وەکالەت لەبارەی مەترسییەکانی گلدانەوەی ئاو لەلایەن وڵاتانی دراوسێوە رایگەیاند، بەپێی ئەو توێژینەوە و راپۆرتە زانستییانەی ئەنجام دراون، ئەگەر کێشەی پیسبوونی ئاو و گلدانەوەی ئاوی رووبارەکان لەلایەن وڵاتانی دراوسێوە بەردەوام بێت، لە ساڵانی داھاتوودا نزیکەی حەوت ملیۆن کەس لە عێراق ناتوانن دەستیان بە ئاوی پێویست بگات، ئەوەش زەنگێکی مەترسیدارە بۆ ئاسایشی نیشتمانی عێراق و زیادبوونی ئاوارەی نێوخۆیی و ھەڵھاتن لەو شوێنانەی کە رووبەڕووی بێئاویی دەبنەوە.

وەزیری ژینگەی عێراق لەبارەی چارەسەرەکانەوە رایگەیاند، لەپێناو چارەسەرکردنی کێشەکانی تایبەت بە ئاو و دوورخستنەوەی مەترسییەکان، پێویستە گرنگی زیاتر بە کەرتی ئاو بدرێت و لە رێگەی دیپلۆماسیشەوە کێشەکان لەگەڵ وڵاتانی دراوسێ چارەسەر بکرێن تاکو عێراق لە مافە ئاوییەکانی بێبەش نەکەن. وتیشی، لە ئێستادا کەرتی ئاو گرنگترین پێشینەی کارەکانی وەزارەتەکەیانە و کار بۆ دانانی پلان و ستراتیژی ئایندەیی دەکەن بۆ چارەسەرکردنی کێشەکان.

بەپێی راپۆرتەکانی وەزارەتی سەرچاوە ئاوییەکانی عێراق، بەھۆی سیاسەتی وڵاتانی دراوسێ و گۆڕانکارییە ژینگەییەکان و کەمیی زانیاریی لەبارەی سەرچاوە ئاوییەکانەوە، لە دە ساڵی رابردوودا گەیشتنی ئاو بە عێراق لە وڵاتانی دراوسێوە ٧٠٪ کەمی کردووە و عێراق تەنھا لە ٣٠٪ مافە ئاوییەکانی بەدەستھێناوە.

لە چەند ساڵی رابردوودا تورکیا و ئێران چەند بەنداو و پڕۆژەیەکی ئاودێریی گەورەیان لەسەر رووبارەکان دروستکرد و بەھۆیەوە گەیشتنی ئاو بە عێراق لەو وڵاتانەوە بۆ کەمترین ئاست لە مێژوودا دابەزی.

 بەپێی لێدوانی بەرپرسانی ئاویش لە ھەرێمی کوردستان ھاتنی ئاو لە بەشێک لە رووبارەکان لە ئێرانەوە بۆ ھەرێم گەیشتووەتە سفر. بەپێی پڕۆگرامێکی نەتەوە یەکگرتووەکانیش عێراق لەگەڵ وڵاتانی سوریا و تورکیا و ئێران گفتوگۆ دەکات بۆ رێکخستنی ئاوی رووبارەکانی دیجلە و فورات و ئەو سەرچاوانەی لە ئێرانەوە ھەڵدەقوڵێن.