تیدرۆس ئەدھانۆم بەڕێوەبەری تەندروستی جیھانی ڕایگەیاند ئامانجی سەرەکی ڕێکخراوەکەی لە بواری بەرەنگاربوونەوەی کۆرۆنا بریتییە لە کوتانی ٧٠٪ی دانیشتوانی جیھان تاکو مانگی ئەیلولی ٢٠٢٢، بەو ھەنگاوەش دەتوانن خاڵی کۆتایی بۆ پەتاکە دابنێن.


ڕوونیشیکردەوە بۆ کوتای ٧٠٪ی دانیشتوانی جیھان پێویستیان بە ١١ ملیار دۆزی ڤاکسینەکان ھەیە. جەختیشی کردەوە، ئەو وڵاتانەی ئابووری جیھان بەڕێوەدەبەن دەتوانن لە ماوەی چەند مانگێکدا بەسەر پەتاکەدا سەربکەون ئەگەر بیانەوێت.


ھەروەھا ئەنتۆنی فاوچی پسپۆڕی نەخۆشییە گواستراوەکانی ئەمریکا ڕایگەیاند، ھێشتا ڤاکسینە ڕێگە پێدراوەکان بە ڕێژەی ٩٠٪ کاریگەرن بۆ کەمکردنەوەی ڕێژەی تووشبوون و گیان لە دەستدانی تووشبووانی کۆرۆنا.


فاوچی لە دانیشتنێکی ئەنجومەنی پیران ڕایگەیاند، لە ھەفتەی ڕابردوودا تێکڕای گیان لە دەستدانی ڕۆژانە لە ئەمریکا گەیشتووەتە ٢٣٩ کەس، ئەوەش بەرزترینە بەراورد بەو ڕێژەیەی لە ھەفتەی ڕابردووتر تۆمار کراوە. جەختیشی کردەوە، ٨٠٪ی ئەو کەسانەی تووشی کۆرۆنا دەبن لە جۆری دەلتایە.


کۆرۆنای گۆڕاوی جۆری دەلتا لەمساڵدا بۆ یەکەمجار لە ھندستان تۆمارکرا و لە ئێستادا زیاتر لە ٩٠ وڵاتی جیھان بڵاوبووەتەوە، ئەوەش ترس و نیگەرانی لای وڵاتانی جیھان دروستکردووە و کار بۆ توندکردنەوەی ڕێکارەکان دەکەن.