سەرۆکایەتیی کاروباری ئایینی لە تورکیا، ئەمڕۆ شەممە لە راگەیەنراوێکدا بڵاوی کردەوە کە سبەینێ یەکشەممە، یەکەم رۆژی جەژنی رەمەزانی پیرۆزە، ئەمەش جیاوازە لەگەڵ کاتی دەستپێکردنی جەژن لە زۆربەی وڵاتانی دیکە.

بەپێی راگەیەنراوەکە، نوێژی جەژن لە ئەنقەرەی پایتەخت کاتژمێر 7:07ـی بەیانیی سبەینێ بەڕێوە دەچێت.

لەلایەکی دیکەوە، سەنتەری نێودەوڵەتیی فەلەکناسی لە هەژماری تایبەتی خۆی لە تویتەر رایگەیاند کە لە مالیزیا و برونای، خۆر ئاوابووە و ئەمڕۆ 28ـەمین رۆژی رەمەزانە لەو وڵاتانە، بۆیە جەژنی رەمەزان لەو وڵاتانە رۆژی دووشەممە دەبێت.

هاوکات، ئەندەنوسیا و بەنگلادیش و پاکستان رۆژی دووشەممەیان وەک یەکەم رۆژی جەژن دیاری کردووە.

لە هەمان کاتدا، ئەنجوومەنی فەتوای ئوسترالیا لە راگەیەنراوێکدا ئاماژەی بەوە داوە، کە کۆتا رۆژی رەمەزان سبەینێ یەکشەممە دەبێت و دووشەممە یەکەم رۆژی جەژنی رەمەزانی پیرۆزە لەو وڵاتە.