ئاوات محەمەد قائیمقامی سلێمانی، بۆ یادی ٢٥ ساڵەی دامەزراندنی دەزگای میدیایی کوردسات لە پەیامێکی پیرۆزباییدا کە ئاڕاستەی دەزگاکەی کردووە دەڵێت، "دەزگای میدیایی کوردسات بە درێژایی تەمەنی، میدیایەکی سەنگین و خاوەنی پرەنسیپ و ئیتیکی بەرزی کاری میدیایی بووە".

دەقی پەیامەکە...

پەیامی قائیمقامی سلێمانی بۆ یادی ٢٥ ساڵەی دامەزراندنی دەزگای میدیایی کوردسات

بەڕێزان بەڕێوەبەر و کارمەندانی دەزگای میدیایی کوردسات بەبۆنەی یادی ٢٥ ساڵەی دامەزراندنی کوردساتی ئازیز بەگەرمی پیرۆزبایتان لێدەکەم و دەستی ماندوبونتان دەگوشم، لە ساڵی نوێی تەمەنی کوردساتدا ھیوای گەشانەوە و سەرکەوتن و بەرەوپێشچونی زیاتر بۆ شاشە رەنگین و سەنگینەکەی کوردسات دەخوازم.

دامەزراندنی کوردسات لەکاتی خۆیدا داھێنان و ھەنگاوێکی گەورە و کاریگەری میدیای کوردی بوو، بۆ ئیستاش لە نێو ئەم ژینگە میدیاییەدا کوردسات هیوایەکی گەورەیە بۆ شێوازی دروستی کاری میدیایی ،

دەزگای میدیایی کوردسات بە درێژایی تەمەنی، میدیایەکی سەنگین و خاوەنی پرەنسیپ و ئیتیکی بەرزی کاری میدیایی بووە و ھەمیشە پێشەنگی و پێگەو جیاوازی خۆی پاراستووە.

بایەخدانی کوردسات بە پارێزگاریکردنی لە ئاکار و رەوشتی بەرزی کۆمەڵگەو خێزانی کورد و ھەرەھا گرنگیدانی بە ھونەر و فەرھەنگ و کلتوری کوردەواریمان بەشێکی ترە لە شانازییەکانی ئەم دامەزراوە میدیایە و کوردسات جێگەی خۆی لە نێو دڵی هەموو تاک و خێزانێکی کورددا کردووەتەوە.

لەم یادەدا پیرۆزبایی گەرمتان ئاراستە دەکەم و  هیوادارم وەک هەمیشە لە پێشەنگیدا بمێننەوە.

ئاوات محەمەد

قائیمقامی سلێمانی