لیوار رکن عومەر ساڵح حسن فەرماندەی هێزەکانی ۷۰ بەبۆنەی ٢٥ هەمین ساڵیادی دامەزراندنی دەزگای میدیایی کوردسات پەیامێکی پیرۆزبایی ئاڕاستەی به‌ڕێوه‌به‌ر، میدیاكاران، كارمه‌ندانی ده‌زگاکە دەکات و دەڵێت، " کوردسات بە لانەدان لە به‌ها جوانەکانی كورده‌واری و ئیتیکی كاری ڕۆژنامەوانی جێگای خۆی لەدڵی هەموو تاکێکی کوردا کردووەتەوە".

دەقی پەیامەکە...

به‌بۆنه‌ی یادی (۲٥) ساڵه‌ی دامه‌زراندنی كه‌ناڵی ئاسمانیی كوردسات، جوانترین پیرۆزبایی خۆمان ئاڕاسته‌ی به‌ڕێوه‌به‌ر و میدیاكاران و سه‌رجه‌م كارمه‌ندانی ده‌زگای میدیایی كوردسات ده‌كەین، هیوای پێشكه‌وتنی زیاتر و سه‌ركه‌وتنی به‌رده‌وامتان بۆ ده‌خوازین.

ھیوادارین وه‌ك ھه‌میشه‌ دەزگاکەتان له‌ خزمه‌ت گه‌یاندنی ڕاستیی رووداوه‌كان و بیروڕا جیاوازه‌كان بێت و ببێته‌ سەکۆی هەموو ڕەنگەکان بێ جیاوازی و ناوەندێک بێت بۆ گەیاندنی خەم و داواکاری هاووڵاتیان و چاودێرێكی ڕاسته‌قینه‌ بێت له‌ سەرجەم ئاست و بوارەکاندا.

کوردسات بە لانەدان لە به‌ها جوانەکانی كورده‌واری و ئیتیکی كاری ڕِۆژنامەوانی جێگای خۆی لەدڵی هەموو تاکێکی کوردا کردۆتەوە، داهێنانی بەردەوام و ڕاستگۆیی لەگەیاندنی پەیامەکان  وایکردوە کوردسات هەمیشە ناوازە دەرکەوێت مۆرك و سیمایەکی تایبه‌ت به‌ خۆی هەبێت و ببێتە دەنگی هەموو تاکێکی کورد لە هەر گۆشەیەکی ئەم جیهانەدا، پڕاو پڕ هەڵگری درووشمەکەی "كوردسات ده‌نگ و ڕەنگی كوردانه‌، كوردسات ده‌نگی هه‌مووانه‌" بێت.

دووباره‌ ساڵیادی دامه‌زراندنی ئه‌م كه‌ناڵه‌ كوردییه‌ ڕەسەنە‌ له‌ به‌ڕێوه‌به‌ران و میدیاكاران و سه‌رجه‌م کارمەندانی پیرۆزبێت، به‌ هیوای گەشەسه‌ندنی زیاتر و سه‌ركه‌وتنی بەردەوام.

لیوار رکن

عومەر ساڵح حسن

فەرماندەی هێزەکانی ۷۰

٣١کانونی یەکەمی ٢٠٢٤