سەرۆکی یەکێتی رایگەیاند، بە خەمێکی قوڵەوە ھەواڵی شەھیدکردنی سەماحەتی سەید حەسەن نەسروڵا ئەمینداری گشتی حزبوڵای لوبنانیان پێگەیشتووە.
بافڵ جەلال تاڵەبانی سەرۆکی یەکێتیی نیشتمانیی کوردستان راگەیەندراوێکی بڵاوکردەوە و تیایدا ھاتووە، بەخەمێکی قوڵەوە ھەواڵی شەھیدکردنی سەماحەتی سەید حەسەن نەسروڵا ئەمینداری گشتی حزبوڵای لوبنانیان پێگەیشتوە و سەرەخۆشی لە خانەوادەی شەھید و گەلی لوبنان و مسوڵمانان و ھاوڕێیانی دەکات.
دەشڵێت، بۆ ئەم کۆستە گەورەیە داوا لە کۆمەڵگەی نێودەوڵەتی دەکات رۆڵی یاسایی و مرۆیی خۆی بگێڕێت بۆ راگرتنی خوێنڕشتن و دەستدرێژیی بۆ سەر فەڵەستین و لوبنان و ناوچەکە.
بافڵ جەلال تاڵەبانی راشیگەیاند، داوا لەھەموولایەنەکان دەکەن تا ئەوپەڕی دانبەخۆداگرتن ئارام بگرن تا ناوچەکە لە جەنگێکی فراوان بەدووربگیرێت و ئیدانەی ئەم کار و تاوانانە دەکەن کە ئیسرائیل دەرھەق بە ھاوڵاتیانی مەدەنی و تیرۆرکردنی سەرکردەکان دەیکات.
وتیشی، خوای گەورە لە شەھیدەکان خۆشبێت و ھیوای چاکبوونەوەی خێراش بۆ برینداران دەخوازێت.