جێگری سەرۆکی ھەرێمی کوردستان پیرۆزبایی لە یەکێتیی نووسەرانی کورد دەکات

2024-02-11   |  
فۆتۆ: 
کوردسات نیوز
شێخ جەعفەر شێخ مستەفا، جێگری سەرۆکی ھەرێمی کوردستان لە ساڵیادی دامەزراندنی یەکێتیی نووسەرانی کورد پەیامێک بڵاودەکاتەوە و دەڵێت، ھیوادارم مەڵبەندی یەکێتی نووسەرانی کورد پێگەیەک بێت بۆ بەرەوپێشچوونی گیانی نیشتیمانپەروەری و پێگەیاندنی نووسەری ڕاستەقینە و بە ئەزموون لەپێناو داکۆکیکردن لە زمان و ناسنامە و کلتوری جوانی کوردستان و دەوڵەمەندکردنی فەرھەنگی نوێی کوردی.

دەقی پەیامی پیرۆزبایی جێگری سەرۆکی ھەرێمی کوردستان....

لە پەنجا و چوارەمین ساڵیادی دامەزراندنی یەکێتیی نووسەرانی کورد، پیرۆزباییەکی گەرم لە مەڵبەندی گشتی یەکێتیی نووسەرانی کورد و گشت نوسەر و ڕۆشنبیران و ئەدیبانی کوردستان دەکەم، ھیوای سەرکەوتنیان بۆ دەخوازم.

ھیوادارم مەڵبەندی یەکێتی نووسەرانی کورد پێگەیەک بێت بۆ بەرەوپێشچوونی گیانی نیشتیمانپەروەری و پێگەیاندنی نووسەری ڕاستەقینە و بە ئەزموون لەپێناو داکۆکیکردن لە زمان و ناسنامە و کلتوری جوانی کوردستان و دەوڵەمەندکردنی فەرھەنگی نوێی کوردی.

سەری ڕێز و نەوازش بۆ ئەو شەھیدانەی لە ڕێگای قەڵەمە بوێر و نووسینەکانیان گیانیان پێشکەش بە کوردستان کرد، چونکە ئێمە گەلێکین لەپێناو داکۆکی لە خەباتی پڕ سەروەری و شۆرشگێری و ئازادی و مافی گەلی کورددا خوێنی دەیان کەسانی ڕۆشنبیر و ئەدیب و قەڵەم بە دەستی بوێرمان لە دەست داوە.

شێخ جەعفەر شێخ مستەفا
جێگری سەرۆکی ھەرێمی کوردستان
٢٠٢٤/٢/١٠