بەیانی ئەمڕۆ ١٢ مووشەک ئاڕاستەی بنکەی سەربازی تورکیا لە ناحیەی زێلکان کران، بەپێی زانیارییەکان لە ماوەی یەک مانگدا دووەمجارە ئەو بنکە سەربازییەی تورکیا مووشەکباران دەکرێت.
پەیامنێری کوردسات نیوز رایگەیاند، سەعات ٧:٤٥ بەیانی ئەمڕۆ ١٢ مووشەک ئاڕاستەی بنکەی سەربازی تورکیا لە ناحیەی زێلکانی سەر بە پارێزگای نەینەوا کران.
وتیشی، پێنج لە مووشەکەکان لەناو سەربازگەکە کەوتوونەتە خوارەوە و مووشەکەکانی دیکە لە دەوروبەری سەربازگەکە کەوتوونەتە خوارەوە و وەک ھێرشەکانی رابردوو سەربازانی تورکیا زیانەکانی مووشەکبارانەکەیان ئاشکرانەکردووە.
ھەروەھا غەیاس سورچی لێپرسراوی راگەیاندنی مەڵبەندی نەینەوای یەکێتی بە کوردسات نیوزی راگەیاند، مووشەکەکان لە سنوری ناحییەی باشیکەوە ئاڕاستەی بنکە سەربازییەکە کراون و ئەمنییەتی ئەو سنورەش لە ژێر دەستی لیوایەکی حەشدی شەعبیدایە.