بەهۆی زۆربوونی ژمارەی تووشبووان بە کۆرۆنا، رێکخراوی تەندروستی جیھانی داوا دەکات وڵاتان رێکاری خۆپارێزی بگرنە بەر و بگەڕێنەوە سەر بەکارھێنانی دەمامک.
تیدرۆس ئەدھانۆم بەڕێوەبەری گشتی رێکخراوی تەندروستی جیھانی رایگەیاندووە، ژمارەی توشبووانی کۆرۆنا لە جیھاندا رووی لە بەرزبوونەوە کردووە و پێویستە ھەموو وڵاتان بگەڕێنەوە سەر پەیڕەوکردنی رێکارەکان، بە تایبەت بەکارھێنانی دەمامک.
ئەدھانۆم نیگەرانیشی دەربڕی لە بەرزبوونەوەی ئامارەکان و وتی فشاری زیاتر لەسەر کەرتی تەندروستی دروست دەبێت.
لە جیھاندا، زیاتر لە ٥٦٤ ملیۆن کەس تووشی کۆرۆنا بوون و سەروو ٦ ملیۆن کەسیش گیانیان لەدەستداوە. زۆرترین ژمارەی توشبووش لە جیھاندا لە ئەمریکایە کە ژمارەی توشبووان لەو وڵاتە ٩٠ ملیۆن کەسی تێپەڕاندووە.