ئەمیری ھۆزی جحیش لە عێراق پشتیوانی خۆی بۆ لیستی ھاوپەیمانی یەکێتی خەڵکی نەینەوا دووپاتکردەوە

2023-12-02   |  
فۆتۆ: 
کوردسات نیوز
لە چوارچێوەی سەردان و بەسەرکردنەوەکانی بۆ لای چین و توێژەکانی جیاکانی پارێزگای نەینەوا و دەوروبەری، ئەمرۆ ئاراس محەمەد ئاغا ئەندامی سەرکردایەتی و سەرۆکی ھاوپەیمانیی یەکێتی خەڵکی نەینەوا لەگەڵ وەفدی مەڵبەندی حەوتی نەینەوا سەردانی"شێخ ئەحمەد حمود تەھا" ئەمیری ھۆزی جحیش لە عێراق و جیھان کرد.

لەو سەردانەدا لەلایەن ئەمیری ھۆزەکەوە و خزمانیەوە پێشوازیکران، ھاوکات چاویانکەوت بە ژمارەیەکی بەرچاو لە کەسایەتی و پیاوماقوڵانی خزمانی جحیش و "شێخ مەزھەر عەلاوی جحیش" کاندیدی ژمارە حەوتی ھاوپەیمانیی _ یەکێتی خەلکی نەینەوا، لە وتەکیشیدا ئاراس محەمەد ئاغا رۆڵی خزمانی جحیشی لە خەبات و قوربانیدان و ئاشتەوایی کۆمەڵایەتی و ھاوکاری خەڵکی دەڤەرەکە بەرزنرخاند و رایگەیاند، ھاوپەیمانیی خەڵکی نەینەوا بەرنامەی جیاوازی ھەیە بۆ خزمەتکردنی دانیشتوانی نەینەوا بەھەموو پێکھاتە و نەتەوە جیاوازەکانی بەشێوەیەک گشت سێکتەرەکانی ژیان بگرێتەوە .

لای خۆشیانەوە خزمانی جحیش ستایشی ھەوڵ و کۆششەکانی یەکێتی و ئاراس محەمەد ئاغا_یان کرد و رایانگەیاند، وەک ھەمیشە لە خزمەتی رێبازەکەی سەرۆک مام جەلالدا دەبن و یەکێتی بەحزبی خۆیان دەزانن، پشتگیری و پشتیوانی خۆیان بۆ لیستی ھاوپەیمانیی _ یەکێتی خەلکی نەینەوا و کاندیدانی دووپاتکردەوە .

ھەمان رۆژ ئاراس محەمەد ئاغا لەبارەگای کۆمیتەی ئازادی عەیاچیە، چاویکەوت بە ژمارەیەک کادر و ئەندام و لایەنگرانی یەکێتی، لە کۆبوونەوەیەکدا ئاراس محەمەد ئاغا جەختی لە گرنگی و بایەخی ھەڵبژاردنی ئەنجومەنی پارێزگای نەینەوا کردەوە و وتی، "پێویستە ھەموومان بەجۆش و خرۆشێکی زۆر کاربکەین بۆ سەرخستنی ھاوپەیمانیەکەمان چونکە تاکە لیستە دەتوانێت مافە رەواکانی دانیشتوانی نەینەوا بەدەستبھێنێت".