باڵیۆزخانەی ئەمریکا لە بەغداد کرایە ئامانج و برینداری لێکەوتەوە

2022-01-13
فۆتۆ: 
کوردسات نیوز
باڵیۆزخانەی ئەمریکا لە بەغداد بە مووشەک کرایە ئامانج و برینداری لێکەوتەوە.

پەیامنێری کوردسات نیوز لە شاری بەغداد ڕایگەیاند، دوو مووشەک ئاڕاستەی باڵیۆزخانەی ئەمریکا لە ناوچەی سەوزی بەغداد کراون، بەڵام سیستمی بەرگریی باڵیۆزخانەکە وەڵامی ھێرشە مووشەکییەکەی داوەتەوە و مووشەکانی خستووەتە خوارەوە.


شانەی ڕاگەیاندنی ئەمنی لە بارەی ھێرشەکەوە ڕایگەیاندووە، ھاووڵاتیانی بێتاوان ڕووبەڕووی ھێرشی تیرۆریستی بوونەتەوە و یەکێک لە مووشەکەکان لە ناو قوتابخانەیەکی ناوچەی سەوز کەوتووەتە و خوارەوە و برینداری لێ کەوتووەتەوە و لێکۆڵینەوە لە زیانەکان دەکەن.


ھاوکات باڵیۆزخانەی ئەمریکا لە بەغداد ڕاگەیاندراوێکی لە بارەی ھێرشەکەوە بڵاوکردەوە و ڕایگەیاند، ھێرشەکەی ئەمشەو لە لایەن گرووپە تیرۆریستییەکانەوە ئەنجامدراوە، کە ھەوڵدەدەن ئاسایش و سەروەری و پەیوەندییە نێودەوڵەتیەکانی عێراق لاواز بکەن. وتیشی، ئەم ھێرشە تەنھا بۆ سەر نێردە دیپلۆماسیەکان نییە، بەڵکو بۆ سەر سەروەریی عێراقیشە.