سوپای ئیسرائیل ھێرشی زەمینی سنورداری بۆ سەر لوبنان دەستپێکرد، سوپای لوبنانیش بە دووری پێنج کیلۆمەتر لە باشوری وڵاتەکە کشانەوە.
سوپای ئیسرائیل لە راگەیەندراوێکدا بڵاویکردۆتەوە ، فیرقەی ٩٨ ی سوپا ئۆپراسیۆنی ئامانجداری لە باشوری لوبنان دەستپێکردووە، ئەوەش دوای ئەوەی لەچەند ھەفتەی ڕابردوودا سەربازانی فیرقەی ٩٨ کە سەربازانی پەرەشوت و کۆماندۆ و لیوای حەوتیشیان تێدابوو، خۆیان بۆ ئۆپەراسیۆنی سنووردار و ناوخۆیی و ئامانجدار لە باشووری لوبنان ئامادە کردووە.
سەرچاوەیەکی ئەمنی لوبنانیش بە ئاژانسی ڕۆیتەرزی ڕاگەیاندووە، ھێزەکانی لوبنان لانیکەم پێنج کیلۆمەتر لەسنووری باشووری وڵاتەکەی کشاندووەتەوە.
لای خۆیەوە، ماتیۆ میلەر وتەبێژی وەزارەتی دەرەوەی ئەمریکا بە ڕۆژنامەنووسانی ڕاگەیاند، ئیسرائیل لەئێستادا ئۆپراسیۆنی سنوردار ئەنجامدەدات دژی حزبوڵا و لەو پرسە ئاگاداری کردوونەتەوە ، دەستەی پەخشی ئیسرائیلیش بڵاویکردووەتەوە ، تەلئەبیب بە واشنتۆنی راگەیاندووە، ھێرشی زەمینی ئیسرائیل بۆ سەر لوبنان درێژە ناخایەنێت.
لەچەند سەعاتی رابردوودا سوپای ئیسرائیل داوای چۆڵکردنی بەپەلەی بەشێک لە باڵەخانەکانی گەڕەکی باشوری بەیروتی کرد و لە ھەمانکاتدا بەردەوامە لە بۆردومانکردنی ئەو ناوچانە.