لە سبەینێوە تۆمارکردنی ناوی پارت و ھاوپەیمانێتییەکان بۆ ھەڵبژاردنی پەرلەمان دەستپێدەکات

2024-03-04   |  
فۆتۆ: 
کوردسات نیوز
لە سبەینێوە تۆمارکردنی ناوی پارت و ھاوپەیمانێتییەکان لە کۆمیسیۆنی باڵای ھەڵبژاردنەکانی عێراق بۆ ھەڵبژاردنی پەرلەمانی کوردستان دەستپێدەکات و ماوەی ١٠ رۆژ بەردەوامدەبێت.

کۆمیسیۆنی باڵای سەربەخۆی ھەڵبژاردنەکانی عێراق رایگەیاند، لە سبەینێوە دەرگای پێشکەشکردنی داواکاری بۆ تۆمارکردنی پارت و ھاوپەیمانێتییە سیاسییەکان بۆ ھەڵبژاردنی پەرلەمانی کوردستان دەکرێتەوە و تا کۆتایی دەوامی رەسمی لە رۆژی ١٤ی ئادار بەردەوام دەبێت.

ھاوکات جومانە غەلای وتەبێژی کۆمیسیۆن بە کوردسات نیوزی راگەیاند، نابێت ھاوپەیمانێتییەکە بەناوی ھیچ یەکێک لە حزبە پێکھێنەرەکانییەوە ناوبنرێت، ھیچ حزبێکیش بۆی نییە لە بازنەیەکی ھەڵبژاردندا بەشداری لە زیاتر لە ھاوپەیمانێتییەکی سیاسی بکات.

وتیشی، دروشم و ناوی ھاوپەیمانێتییەکانیش نابێت پێچەوانەی سیستەم و ئادابی گشتی بێت و گوزارشت لە رق و توندوتیژی بکات، یان وێنەی کەسایەتی ئاینی و سەربازییەکان بەکاربھێنرێت.

ھاوکات ھێمان تەحسین بەڕێوەبەری فەرمانگەی رێکخراو و لایەنەسیاسییەکان لە کۆمیسیۆن راگەیاند، لە رۆژی ١٢ی ئادارەوە دەستدەکرێت بە تۆمارکردنی لیستی کاندیدەکان و بانگەشەی ھەڵبژاردنیش ماوەی مانگێک بەردەوام دەبێت.