ئەمڕۆ وادەی نوێکردنەوەی تۆماری دەنگدەرانی ھەرێمی کوردستان کۆتایی دێت

2024-02-29   |  
فۆتۆ: 
کوردسات نیوز
ئەمڕۆ ئەو وادەیە کۆتایی دێت کە کۆمیسیۆنی باڵای ھەڵبژاردنەکانی عێراق بۆ ناوتۆمارکردن و نوێکردنەوەی تۆماری دەنگدەرانی ھەرێمی کوردستانی دیاریکردووە.

لە رۆژی ٢٠ی ئەم مانگەوە کۆمیسیۆن جارێکی دیکە وادەی ناوتۆمارکردن و نوێکردنەوەی تۆماری دەنگدەرانی لە ھەرێمی کوردستان تا ئەمڕۆ درێژکردەوە، ژمارەی ئەو دەنگدەرانەشی لە ھەرێم سەردانی ناوەندەکانی تۆماری بایۆمەترییان کردووە تا ١٥ ئەم مانگە گەیشتووە ٣١ ھەزار و ٨٨٩  کەس.

بەپێی زانیاریەکانی کۆمیسیۆن، ژمارەی دەنگدەران لە ھەرێم سێ ملیۆن و ٧٨٩ ھەزار و ٤٠٥ دەنگدەرە کە مافی بەشداریکردنیان لە ھەڵبژاردن پەرلەمانی کوردستاندا ھەیە و ئەوانەی کارتی بایۆمەتری دەنگدانیان ھەیە لە ھەرێمی کوردستان ژمارەیان زیاتر لە دوو ملیۆن و ٣٥٠ ھەزار کەسن.