کاندیدی دەمپارتی بۆ سەرۆکی شارەوانی ئیستانبوڵ: کار بۆ یەکسانی و ئاشتی دەکەین

2024-02-10   |  
فۆتۆ: 
کوردسات نیوز
کاندیدی دەمپارتی بۆ سەرۆکایەتی گەورە شارەوانی ئیستانبوڵ دەڵێت، بە ئیرادەی ژنان و بە جۆشوخرۆشی گەنجان دەست بە بانگەشە دەکەن.

مەڕاڵ دانیش بێشتاش، کاندیدی پارتی یەکسانی و دیموکراسی گەلان (دەمپارتی) بۆ ھاوسەرۆکایەتی گەورە شارەوانی ئیستانبوڵ یەکەمین پەیامی خۆی بڵاوکردەوە و ئەوەی خستوەتەڕوو، پلانی پارتەکەی ئەوەیە ئیستانبوڵ بکاتە شاری یەکسانی و ئومێد و ئاشتی.

باسی لەوەشکرد، بە ئیرادەی ژنان و بە جۆشوخرۆشی گەنجان و پشتیوانی گەل ھەڵمەتی ھەڵبژاردن دەستپێدەکەن و لەڕوی جەماوەرییەوە گەشەی زیاتر دەکەن.

بەگوێرەی نوێترین ئامار کە دەستەی ئاماری تورکیا بڵاویکردووەتەوە نزیکەی ٣٣٪ـی دەنگدەرانی ئیستانبوڵ لە بنەڕەتدا خەڵکی پارێزگاکانی باکوری کوردستانن و دەنگی ئەوان لە ھەڵبژاردنەکەی ٣١ی ئازاردا یەکلاییکەرەوە دەبێت.