رێکخراوی ھەنگاو: ساڵی رابردوو لە رۆژھەڵاتی کوردستان ٤١ کۆڵبەر کوژراون

2024-02-10   |  
فۆتۆ: 
کوردسات نیوز
ساڵی رابردوو لە رۆژھەڵاتی کوردستان ٤١ کۆڵبەر کوژراون و ٢٩٣ کۆڵبەری دیکەش برینداربوون، بەراورد بە ساڵی ٢٠٢٢ش بە ئامانجگرتنی کۆڵبەران ١٥٪ زیادیکردووە.

رێکخراوی مافی مرۆڤی ھەنگاو راپۆرتی ساڵی ٢٠٢٣ی تایبەت بە رەوشی کۆڵبەرانی رۆژھەڵاتی کوردستان بڵاوکردەوە و ئەوەی خستووەتەڕوو، زۆرترین ئاماری کۆڵبەرانی کوژراو و بریندار لە سنوورەکانی پارێزگای سنە تۆمارکراوە کە ٢٨ کۆڵبەر کوژراون و ١٥٣ی تریش برینداربوون.

باسی لەوەشکردووە، سەرەڕای کوژرانی سەدان کۆڵبەر لە چەند ساڵی رابردودا کە ٨٥٪ـی ھۆکارەکان بە دەستڕێژی گولـلەی ھێزەکانی پاسەوانی سنور بوون، بەڵام ھیچکام لە تاوانبارانی کوژرانی کۆڵبەرانی کورد لەلایەن دەزگای دادی ئێرانەوە لێپرسینەوەیان لەگەڵدا نەکراوە.

بەگوێرەی راپۆرتی ھەمان رێکخراو ساڵی ٢٠٢٢ لە رۆژھەڵاتی کوردستان  ٤٦ کۆڵبەر گیانیانلەدەستدابوو، ٢٤٤ تریش برینداربوو بوون.