قەتەر: حەماس و ئیسرائیل خواستیان لەسەر ئاگربەست نییە

2023-12-10   |  
فۆتۆ: 
کوردسات نیوز
سەرۆکوەزیرانی قەتەر دەڵێت حەماس و ئیسرائیل خواستیان لەسەر ئاگربەست نییە و حەماسیش دەڵێت، تا ئەوکاتەی دواکارییەکانی جێبەجێنەکرێت ھیچ بارمتەیەک بە زیندوویی لەغەززە ناچێتە دەرەوە.

محەمەد بن عەبدولڕەحمان ئال سانی سەرۆکوەزیرانی قەتەر رایگەیاند، سەرەڕای ھێرش و بۆردومانە بەردەوامەکانی ئیسرائیل بۆسەر کەرتی غەززە، وەک حکومەتی قەتەر بەردەوامن لە ھەوڵەکانیان بۆ نێوەندگیری لە نێوان حەماس و ئیسرائیل بە مەبەستی گەیشتن بە ئاگربەست و ئازادکردنی بارمتەکان، بەڵام نایشارنەوە کە نە حەماس و نە ئیسرائیل لە ئێستادا خواستیان لەسەر ئاگربەست نییە.

لای خۆیەوە، ئەبو عوبەیدە وتەبێژی کەتائیبی قەسام کە باڵی سەربازیی بزوتنەوەی حەماسە رایگەیاند، سوپای ئیسرائیل لە رێگەی ھێرش و بۆردومانەکانییەوە ھەموو سنورەکانی بەزاندووە و سڵ لە کوشتنی ژن و منداڵیش ناکاتەوە، جەختیش دەکەنەوە تا ئەو کاتەی داواکارییەکانیان جێبەجێنەکرێن ھیچ بارمتەیەک بە زیندوویی لە کەرتی غەززە ناچێتە دەرەوە.