چوارچێوەی ھەماھەنگی: دەستوەردان ناکەین لە دیاریکردنی کەسێک بۆ شوێنی حەلبوسی

2023-11-30   |  
فۆتۆ: 
کوردسات نیوز
چوارچێوەی ھەماھەنگی شیعەکان رایدەگەیەنێت، دەستوەردان ناکەن لە دیاریکردنی کەسێک بۆ پۆستی سەرۆکی ئەنجومەنی نوێنەرانی عێراق و ئەو بابەتەیان بۆ سوننەکان بەجێھێشتووە.

عەلی تورکی ئەندامی ئەنجومەنی نوێنەران سەر بە چوارچێوەی ھەماھەنگی رایگەیاند، چوارچێوە ھیچ دەستوەردانێک ناکات بۆ دیاریکردنی کەسێک بۆ شوێنی محەمەد حەلبوسی سەرۆکی دوورخراوەی ئەنجومەنی نوێنەران، بەڵکو ئەو بابەتەیان بۆ سوننەکان بەجێھێشتووە و ئەنجومەنی نوێنەران دوای رێککەوتنی سوننەکان لەسەر کەسێک، دەنگ لەسەر ئەو پۆستە دەدات. 

وتیشی، پۆستی سەرۆکی ئەنجومەنی نوێنەران تایبەتە بە سوننەکان، ھیچ پێکھاتەیەک ناتوانێت دەستوەردانی تێدا بکات.

ھاوکات حەسەن فەدعەم، سەرکردە لە چوارچێوەی ھەماھەنگی شیعەکان رایگەیاند، دەتوانرێت پێش ھەڵبژاردنی ئەنجومەنی پارێزگاکانی عێراق جێگرەوەی حەلبوسی یەکلابکرێتەوە.