چوارچێوەی ھەماھەنگی: دەتوانرێت پێش ھەڵبژاردنی پارێزگاکان جێگرەوەی حەلبوسی دیاریبکرێت

2023-11-29   |  
فۆتۆ: 
کوردسات نیوز
چوارچێوەی ھەماھەنگی شیعەکان دەڵێت، دەتوانرێت پێش ھەڵبژاردنی ئەنجومەنی پارێزگاکانی عێراق جێگرەوەی حەلبوسی یەکلابکرێتەوە.

حەسەن فەدعەم سەرکردە لە چوارچێوەی ھەماھەنگی شیعەکان رایگەیاند، پۆستی سەرۆکی ئەنجومەنی نوێنەرانی عێراق پۆستێکی گرنگە و نابێت بەو شێوەیەی ئێستا بە بەتاڵی بمێنێتەوە و لەناو چوارچێوەی ھەماھەنگیشدا ھیچ دابەشبوون و کێشەیەک نییە لەسەر ئەو ناوانەی بۆ پۆستی سەرۆکی نوێی ئەنجومەنی نوێنەرانی عێراق دیاری دەکرێن.

وتیشی، لایەنە سیاسییەکان و چوارچێوەی ھەماھەنگیش لە گفتوگۆ و دانوستاندان بە مەبەستی دیاریکردنی وادەیەک بۆ کۆبوونەوەی ئەنجومەنی نوێنەران تایبەت بە ھەڵبژاردنی سەرۆکی نوێی ئەنجومەنەکە و لەچەند رۆژی داھاتووشدا چوارچێوەی ھەماھەنگی بە رەسمی ھەڵوێستی خۆی لەبارەی ئەو پۆستە بە لایەنە سوننەکان رادەگەیەنێت.