ترەمپ لە بەردەم دادگادا تۆمەتی درۆکردن لەبارەی سامانەکەی رەتکردەوە

2023-10-02   |  
فۆتۆ: 
کوردسات نیوز
جارێکی دیکە سەرۆکی پێشووی ئەمریکا بەتۆمەتی درۆکردن لەبارەی سەروەت و سامانەکەی چووە بەردەم دادگا، سەرجەم تۆمەتەکانیشی رەتکردەوە.

دۆناڵد ترەمپ سەرۆکی پێشووی ئەمریکا لەسەر سکاڵایەکی لیتیا جەیمس داواکاری گشتی نیویۆرک، چووە بەردەم دادگای مانھاتنی نیویۆرکی ئەمریکا و بڕیارە دادگاییکردنەکەش بۆ ماوەی دوو رۆژ بەردەوامبێت، لە سکاڵاکەدا داواکاری گشتی نیویۆرک ترەمپی بەوە تۆمەتبارکردووە، کە بە درۆکردن سەروەت و سامانەکەی لە ساڵانی ٢٠١١ -٢٠٢١ لە ٨١٢ ملیۆن دۆلارەوە کردووەتە ٢.٢ ملیار دۆلار، تاکو بتوانێت بە مەرجی باشتر قەرز لە بانکەکان وەربگرێت.

لای خۆیەوە، دۆناڵد ترەمپ جگە لەوەی داواکاری گشتی نیویۆرک بە بەرپرسێکی "گەندەڵ" ناوبرد و دادگاییەکی بە دادگاییەکی" گاڵتەجاڕ" وێناکرد و سەرجەم تۆمەتەکانی رەتکردەوە و رایگەیاند، بەردەوامی تۆمارکردنی سکاڵا لەسەری لەچوارچێوەی ئەو ھەڵمەتە سیاسییە کە دژی بەڕێوەدەچێت.

لەماوەکانی رابردوودا، چەند جارێک دۆناڵد ترەمپ بە تۆمەتی جیاواز سکاڵا دژی تۆمارکراوە و دادگاییکراوە، لە دیارترین ئەو تۆمەتانەشی ئاڕاستەی کراوە، ساختەکاریکردنە لە ھەڵبژاردنی سەرۆکایەتی ئەمریکا لە ساڵی ٢٠٢٠.