سەرۆکوەزیرانی عێراق لەدوای کۆبوونەوەی لەگەڵ وەفدی باڵای حکومەتی ھەرێمی کوردستان راگەیەندراوێکی بڵاوکردەوە و ئاماژەی بەوەکرد، حکومەت جددیە لە دۆزینەوەی چارەسەری کێشەکانی نێوان حکومەتی فیدراڵ و ھەرێم.
محەمەد شیاع سودانی سەرۆکوەزیرانی عێراق رایگەیاند، ئەمڕۆ پێنجشەممە، پێشوازییان لە مەسرور بارزانی، سەرۆکی حکومەتی ھەرێمی کوردستان و قوباد تاڵەبانی جێگری سەرۆکی حکومەتی ھەرێمی کوردستان و وەفدی یاوەرییان کرد و جەختیان لەسەر پێویستی دۆزینەوەی چارەسەرێک بۆ کێشە یاسایی و داراییەکانی نێوان حکومەتی فیدراڵی و حکومەتی ھەرێم کردەوە، بەگوێرەی دەستوور و یاسا."
ئاماژەی بەوەشکرد، حکومەت جددیە لە دۆزینەوەی رێگەچارەی ریشەیی بۆ مامەڵەکردن لەگەڵ ھەرێمی کوردستان، ھەروەھا کاردەکات بۆ دڵنیابوون لە ژیانێکی شایستە بۆ ھاوڵاتیانی عێراقی، بە ھاوڵاتیانی ھەرێمەوە، ھیچ کێشەیەکی یاسایی و کارگێڕی کاریگەرییان لەسەر نەبێت.