بەڕێوەبەرایەتی کشتوکاڵی کەرکوک لەسەر داوای سوپای عێراق، رووپێوی بۆ زەوییەکانی سنوری تۆپزاوا دەکات، ئامانجی رووپێوییەکەش گەڕاندنەوەی زەوییەکانی تۆپزاوایە بۆ ژێر دەستی وەزارەتی بەرگریی عێراق.
بەڕێوەبەری کشتوکاڵی کەرکوک بە نوسراوێک ھۆبەی کشتوکاڵی یایچی راسپاردووە دەست بە رووپێویی و جیاکردنەوەی زەوییەکانی کەرتی ٢٣ی دیبەگ - تەپە و ٢٤ی تۆپزاوا بکەن بۆ ئەوەی ئەو زەویانە بگەڕێندرێنەوە بۆ ژێر دەسەڵاتی وەزارەتی بەرگریی عێراق، بەو شێوەیەش جوتیارانی کورد و تورکمان لەسنوری تۆپزاوا ھیچ پارچە زەوییەکیان لەژێر دەستدا نامێنێت.
نوسراوەکەی بەڕێوەبەری کشتوکاڵی کەرکوک، لەسەر داوای فەرماندەی فیرقەی ١١ی سوپای عێراقە، کە رۆژی ٢٩ی مانگی رابردوو، داوای لە بەڕێوەبەرایەتیی کشتوکاڵی کەرکوک کردووە، سنووری زەوییەکانی کەرتی ٢٣ی دیبەگ -تەپە و ٢٤ی تۆپزاوا دیاری بکات.
رۆژی پێنجشەممەش خالید شوانی وەزیری دادی عێراق، لە کۆبوونەوەیەکدا لەگەڵ جوتیارانی کورد و تورکمانی سنوری تۆپزاوا رایگەیاند، سەبارەت بە موڵکداری زەوییەکان بە رێگەی یاسایی ھەموو ھەوڵەکانیان خستووەتەگەڕ، تا بیسەلمێنن جوتیارانی کورد و تورکمان خاوەنی راستەقینەی زەوییەکانی سنوری تۆپزاوان و دەستوەردانی نایاسایی رەتدەکەنەوە، بۆ ئەو مەبەستەش نوسراویان ئاراستەی وەزارەتی بەرگریی عێراق کردووە و لە ماوەیەکی نزیکدا وەڵام دەدرێنەوە و کێشەکە چارەسەر دەکرێت.