نرخی بەرمیلێک نەوتی برێنت دادەبەزێت

2023-03-28   |  
فۆتۆ: 
لاڤە
دوای ئەوەی نرخی نەوت لە جیھاندا، بەھۆی راگرتنی ھەناردەکردنی نەوتی ھەرێمی کوردستان بەرزبووەوە، ئەمڕۆ نرخی بەرمیلێک نەوتی برێنت بۆ ٧٧ دۆلار و ٧٣ سەنت دابەزی.

ئەمڕۆ نرخی یەک بەرمیل نەوتی برێنت لە بازاڕەکانی جیھاندا ٣٨ سەنت دابەزینی تۆمارکرد و گەیشتە ٧٧ دۆلار و ٧٣ سەنت. نرخی نەوتی تەکساسیش ١٢ سەنت دابەزی و بە ٧٢ دۆلار و ٦٢ سەنت مامەڵەی پێوەکرا.

دابەزینی نرخی نەوت، لەکاتێکدایە کە لە ماوەی چوار رۆژی رابردوودا بەھۆی راگرتنی ھەناردەی نەوتی ھەرێمی کوردستانەو، نرخی نەوت لە بازاڕەکانی جیھان زیاتر لە سێ دۆلار بەرزبووەوە، لە ئەگەری دەستپێنەکردنەوەی ھەناردەی نەوتی ھەرێمیش، پێشبینیدەکرێت نرخی نەوت جارێکی دیکە روو لە بەرزبوونەوە بکات. 

ھەر بە پێی پێشبینییەکان، ناجێگیری نرخی نەوت بەردەوام دەبێت، چونکە چاوەڕواندەکرێت ھاوردەی چین لە نەوت بەڕێژەی ٦.٢% لەمساڵدا بەرزببێتەوە، چاودێرانیش پێیانوایە بوژانەوەی چین رۆڵی دەبێت لە گۆڕانی نرخی نەوت.



 زۆرترین خوێندراو