مەزڵوم کۆبانێ، فەرماندەی گشتی ھێزەکانی سوریای دیموکرات رایگەیاند، ئەو ٩ شەڕڤانەی ھەسەدە کە لە رووداوی کەوتنەخوارەوەی دوو ھێلیکۆپتەر لە ھەرێمی کوردستان شەھید بوون سەرقاڵی پرۆگرامێکی ھاوبەش بوون بۆ رووبەڕووبوونەوەی داعش.
مەزڵوم کۆبانێ لە تویتێکدا دەڵێت، سەرەخۆشی لە خۆمان و خانەوادەی ھەر ٩ شەھیدەکە دەکەین، دەشڵێت، ئەو قوربانییەی کە ئەو شەھیدانە داویانە دەبێت رێگەیەک بۆ ئێمە لە پاراستنی ئازادی گەل و خاکەکەمان.
فەرماندەی گشتی ھەسەدە ئاماژەی بەوەشکردووە، ھێزە تایبەتەکانی دژەتیرۆر لەو رووداوەدا ٩ شەڕڤانی لەدەستدا لەنێویشایندا شەڕژان کۆبانێ ھەبوو کە فەرماندەی یەکینەی دژەتیرۆر بوو، ھەموو شەھیدەکان لە ئەرکێکدا بوون بۆ کارێکی ھاوبەش دژی چەکدارانی داعش.
پێشتریش، ھێزەکانی سوریای دیموکرات، راگەیەنراوێکی لەبارەی کەوتنەخوارەوەی "ھێلیکۆپتەرەکانی" چەمانکێ بڵاوکردەوە و دەڵێت، چەند شەرڤانێکی لەنێو هێلیکۆپتەرەکاندا بوون و بەرەو سلێمانی دەڕۆیشتن.
ھەسەدە دەشڵێت، هێلیکۆپتەرەکان دوو دانە بوون و بەهۆی کەوتنەخوارەوەیان، نۆ شەڕڤانی یەکەکانی دژەتیرۆر شەھید بوون و بەھۆی خراپی کەشوھەواوە ھێلیکۆپتەرەکان کەوتوونەتەخوارەوە.