ئەنجومەنی نوێنەرانی عێراق ھێرشەکانی ئێران بۆ سەر ھەرێمی کوردستان تاوتوێ دەکات

2022-10-07   |  
فۆتۆ: 
لاڤە
سبەینێ ئەنجومەنی نوێنەرانی عێراق گفتوگۆ لەبارەی ھێرشەکانی ئێران بۆ سەر خاکی ھەرێمی کوردستان دەکات.

بەپێی کارنامەی کۆبوونەوەکە، کۆبوونەوەکەی سبەینێ شەش بڕگە لەخۆدەگرێت و دوای سوێندخواردنی چەند پەرلەمانتارێک، گفتوگۆ لەبارەی ھێرشەکانی ئێران بۆ سەر ناوچەکانی ھەرێمی کوردستان دەکرێت.
دواتریش خوێندنەوەی یەکەم بۆ سێ پڕۆژە یاسا دەکرێت کە دیارترینیان پڕۆژە یاسای دەستەبەری کۆمەڵایەتی و خانەنشینی کرێکارانە.

رۆژی دوو شەممەش جارێکی تر ئەنجومەنی نوێنەرانی عێراق کۆدەبێتەوە و خوێندنەوەی یەکەم بۆ شەش پڕۆژە یاسا دەکات، کە دیارترینیان پرۆژە یاسای ھەمواری یەکەمی دامەزراوەی شەھیدان و پرۆژە یاسای ھەمواری یەکەمی یاسای کۆمپانیای نیشتمانی نەوتی عێراقە.