بەھۆی ئاوارەبوون و جێھێشتنی ناوچەکانی خۆیانەوە، نزیکەی یەک ملیۆن ھاوڵاتی عێراقی خاوەنی ھیچ ناسنامە و کارتێکی خۆناساندن نیین.
بەگوێرەی ڕاگەیەندراوێکی چەند ڕێکخراوێکی نێودەوڵەتی بواری کۆچ و پەنابەری و ڕێکخراوی دادپەروەری عێراقی و ڕێکخراوی مافی مرۆڤی کوردستان، نزیکەی میلیۆنێک ھاوڵاتی عێراقی خاوەنی ھیچ بەڵگەنامەیەکی فەرمی خۆناساندن نین.
لە ڕاگەیەندراوەکەدا ئەوەش خراوەتەروو، ئەو کەسانە بەھۆی کۆچ و ئاوارەبوونەوە ھەموو بەڵگەنامەیەکی مەدەنیان لەدەستداوە و تۆمارنەکراون، بەو ھۆیەشەوە گەیاندنی کۆمەکە فریاگوزارییەکان پێیان ئاستەنگیان بۆ دروستبووە.
ئاماژە بەوەشکراوە، ئەو کەسانە مەترسی ھەژاری و پەراوێزبوونی زیاتریان لەسەرە، چونکە تائێستا ناتوانرێت لە ڕەوشی ئاوارەبووندا ھیچ ھاوکارییەکیان بکرێت.
ئەو ڕێکخراوە مرۆییانە ڕوونیانکردووەتەوە، ئەو عێراقیانەی ئاوارەی ناوەوەو و دەرەوی وڵاتەکەیان بوون، بەئاسانی دەستیان بە دامەزراوە مەدەنییەکانی دەوڵەت ناگات، بۆ وەرگرتنی بەڵگەنامەی فەرمی.