بەرێوەبەرایەتی گشتی ئۆپراسیۆنەکانی ئاسایش بڵاویکردەوە، لەدوو ئۆپراسیۆنی سەرکەوتوودا، لەدەوروبەری سلێمانی توانیان دوو تیرۆریستی داعش دەستگیربکەن.

ئاماژەی بەوەشکردووە، لەرۆژی 12 تا 16ی ئەم مانگە بەڕێوەبەرایەتی گشتی ئۆپراسیۆنەکانی ئاسایش، لەسەر بنەمای زانیاری هەواڵگری و بەبڕیاری دادوەری لێکۆڵینەوەی ئاسایش، دوای بەدواداچوون و کۆکردنەوەی زانیاری وورد و دەستنیشانکردنی شوێنی تیرۆریستان توانیان دوو تیرۆریستی داعش لەدەوروبەری شاری سلێمانی دەستگیربکەن.

بەرێوەبەرایەتی گشتی ئۆپراسیۆنەکانی ئاسایش راشیگەیاند، تیرۆریستان بەمەبەستی خۆڕێکخستنەوە روویان لەدەوروبەری شاری سلێمانی کردبوو، لەرابردوودا چەندین خولی شەرعی و سەربازیان بینیوە.

ئەوەشی خستەڕوو لەئێستادا تۆمەتباران بەماددەی (دوو)ی تیرۆر راگیراون و رووبەڕوی یاساکرانەوە و لێکۆڵینەوە لە دۆسیەکانیان بەردەوامە.

دوای ئەنجامدانی زنجیرەیەك كۆبوونەوە و چاوپێكەوتن، وەفدی ئیمراڵی هەرێمی كوردستانی بەجێهێشت و بڕیارە ئەنجامی كۆبوونەوەكان بۆ رایگشتی بڵاوبكەنەوە.

وەفدی ئیمراڵی دەم پارتی لەسەر راسپاردەی عەبدوڵا ئۆجەلان، چەندین كۆبوونەوەیان لەگەڵ لایەنە سیاسییەكانی توركیا و بەشێك لە زیندانیانی سیاسی ئەنجامدا، لەو چوارچێوەیەشدا شەممەی رابردوو وەفدی ئیمراڵی لە سنوری زاخۆوە گەیشتە هەرێمی كوردستان و زنجیرەیەك كۆبوونەوەی لەگەڵ بەشێك لەلایەنە سیاسییەكانی هەرێم ئەنجامدا.

رۆژی سێشەممەش وەفدی ئیمراڵی لە سلێمانی لەگەڵ بافڵ جەلال تاڵەبانی سەرۆكی یەكێتیی نیشتمانیی كوردستان و قوباد تاڵەبانی جێگری سەرۆكی حكومەتی هەرێم و شاناز ئیبراهیم ئەحمەد خانمی یەكەمی عیراق كۆبووەوە و پەیامەكەی ئۆجەلان بۆ دەستپێكردنەوەی پرۆسەی ئاشتی لە توركیا و باكوری كوردستان تاوتوێكرا.

دواتر وەفدی ئیمراڵی گەڕانەوە بۆ توركیا و بڕیارە ئەنجامی كۆبونەوەكانیان لەگەڵ لایەنە سیاسییەكانی هەرێم بۆ رایگشتی بڵاوبكەنەوە، دواتریش ئەنجامی كۆبوونەوەكان بگەیەننەوە بە ئۆجەلان.

یەڵماز تونچ وەزیری دادی توركیاش سەبارەت لەبارەی سەردانی وەفدەكە بۆ ئیمراڵی رایگەیاندوە، پێشتر وەفدی دەم پارتی دووجار سەردانی ئیمراڵییان كردووە، ئەگەر داواكاری نوێ‌ پێشكەش بكرێت، هەڵیدەسەنگێنن و ڕێگە بە چاوپێكەوتنی ئۆجەلان دەدەن.

بافڵ جەلال تاڵەبانی سەرۆکی یەکێتیی نیشتمانیی کوردستان، پرسەنامەیەک ئاڕاستەی سەرۆکی عەشیرەتی دۆسکی و عەشیرەتی دۆسکی دەکات.

دەقی پرسەنامەکە

بەڕێز کاک سەربەست دێوالی ئاغا، سەرۆکی عەشیرەتی دۆسکی

بەڕێزان بنەماڵەی سەربەرزی کەمال تاهیر سەعید ئاغا دۆسکی

خزمانمان لە عەشیرەتی دۆسکی

بەداخ و خەمێکی زۆرەوە، هەواڵی کۆچی دوایی کەسایەتی دیارو تێکۆشەر هەڤاڵ (کەمال تاهیر سەعید ئاغا دۆسکی)مان پێگەیشت.

بۆ ئەم خەمە پرسەو سەرەخۆشی ئاڕاستەی ئێوەو بنەماڵە سەربەرزەکەتان دەکەین کە رۆڵتان لەخەباتی کوردایەتیدا دیاروبەرچاوە.

لەخوای گەورە داواکارین گیانی هەڤاڵی کۆچکردوومان بەبەهەشتی بەرین شادبکات، ئارامی و سەبووریش بەهەموولایەک بدات.

دڵسۆزتان

بافڵ جەلال تاڵەبانی

سەرۆکی یەکێتیی نیشتمانیی کوردستان

ئەندامێكی لیژنەی دارایی هۆشداری لە سەپاندنی سزای ئەمریكا بەسەر بانك و دامەزراوە داراییەكانی عیراقدا دەدات و دەڵێت، تائێستا هیچ پلانێكی حكومی روون نییە، بۆ كۆنترۆڵكردنی بازاڕی دراو و كەرتی ئابووری لە عیراقدا.

مستەفا كەرعاوی ئەندامی لیژنەی دارایی ئەنجومەنی نوێنەرانی عیراق لە لێدوانێكی رۆژنامەوانیدا رایگەیاند، هەر سزایەكی ئەمریكا بۆ سەر بانك و دامەزراوە داراییەكانی عیراق، لەناوخۆی وڵاتدا خواست لەسەر دۆلار زیاد دەكات و نرخی ئەو دراوە بەرانبەر دینار بەرز دەكاتەوە، ئەوەش سەقامگیری و هاوسەنگی بازاڕی دراوی عیراق تێكدەدات.

وتیشی، پێویستە بانكی ناوەندی سیستمێكی گونجاو و راستەقینە بۆ كۆنترۆڵكردنی بازاڕی دراوی عیراق بدۆزێتەوە، بە پێچەوانەوە ناسەقامگیری بازاڕی دراو درێژخایەن دەبێت.

ئەو پەرلەمانتارە راشیگەیاند، تائێستا حكومەتی عیراق سەركەوتوو نەبووە لە داڕشتنی پلانێك بۆ كۆنترۆڵكردنی بازاڕی دراو و كەرتی دارایی و نرخی دۆلار بەرانبەر دینار.

د. لەتیف رەشید سەرۆک کۆماری عیراق ئەمڕۆ چوارشەممە 19-2- 2025 لە کۆشکی بەغداد پێشوازیکرد لە دادوەر ئەحمەد ئەنوەر سەرۆکی دەستەی دەستپاکی لە هەرێمی کوردستان. 

لە میانی دیدارەکەدا باس لە چۆنیەتی پەرەپێدانی هەماهەنگی نێوان دەزگای چاودێری فیدراڵی و هاوتاکانیان لە هەرێم کرا، بۆ دڵنیابوون لە پاراستنی سامانی گشتی و چەسپاندنی بنەماکانی لێپرسینەوە و دەستپاکی و شەفافیەت لە دەزگاو دامەزراوەکانی دەوڵەتدا.

سەرۆک کۆمار جەختیکردەوە لە گرنگی پاڵپشتیکردنی دەزگاکانی چاودێری تا توانای ئەوەیان هەبێت کە بە شێوەیەکی سەربەخۆ ئەرکەکانیان بەجێبگەیەنن، جەختیکردەوە کە بەرەنگاربوونەوەی گەندەڵی ئەرکێکی لە پێشینەی نیشتمانییە کە پێویستی بە هەوڵی هاوبەش هەیە لە نێوان هەموو لایەنە پەیوەندیدارەکاندا.

لای خۆیەوە دادوەر ئەحمەد ئەنوەر باسی لەو ڕێوشوێنانەدا کرد کە دەستەی دەستپاکی لە هەرێمی کوردستان بۆ بەرەنگاربوونەوەی گەندەڵی گرتوویەتیە بەر، جەختیشیکردەوە لەسەر پابەندبوونی دەستە بۆ کارکردن بە هاوبەشی لەگەڵ دەزگاکانی چاودێری فیدراڵی بۆ هێنانەدی ئامانجە نیشتمانییەکان لەم بوارەدا.

سەرۆک کۆمار د.لەتیف ڕەشید، ئەمڕۆ سێشەممە لە بەغداد، پێشوازیکرد لە زیاد عەلی فازل وەزیری کارەبا و لە دیدارەکەدا باسیان لە ئامادەکارییەکان بۆ گواستنەوە و دابەشکردنی کارەبا کرد لە وەرزی هاوین دا.

 لەدیدارەکەدا باس لەپلانی وەزارەتی کارەبا و ئامادەکارییەکان بۆ ڕووبه ڕووبوونەوەی وەرزی هاوین لەڕووی بەرهەمهێنان و گواستنەوه و دابەشکردن کرا  و سەرۆک کۆمار ئاماژەی بەگرنگی هەوڵی بێووچان کرد بۆ دۆزینەوەی چارەسەرێکی گونجاو بۆ کێشەکانی تۆڕی کارەبا.

هەروەها جەختی کردەوە لە پێویستی دابینکردنی سەرچاوەی پاڵپشتی پێویست بۆ وێستگەکانی بەرهەمهێنان و چالاککردنی وەبەرهێنان لەم کەرتەگرنگەدا و مامەڵەکردن لەگەڵ کۆمپانیا جیهانیە تایبەتمەندەکاندا.

 سەرۆک کۆمار دوپاتی کردوە لەگرنگی کاراکردنی هەماهەنگی و هاوکاری هاوبەش لەنێوان حکومەتی فیدراڵ و حکومەتی هەرێمی کوردستان لەبارەی دۆسێی ووزەوە، لەپێناو پەرەپێدانی کەرتی کارەبا و پێشکەشکردنی باشترین خزمەتگوزاری بەهاوڵاتیان و پاڵپشتیکردنی پڕۆژە هاوبەشەکان.

 لەلای خۆیەوە وەزیری کارەبا، هەوڵی وەزارەت و فەرمانگەکانی بۆ زیادکردنی کاتژمێرەکانی پێدانی کارەبای بۆ هاووڵاتیان دووپاتکردەوە و هاوکات هەڵمەتەکانی کادرە تەکنیکیەکان بۆ پاراستن و پەرەپێدانی تۆڕی کارەبا خستەڕوو و ستایشی پەرۆشی راستەوخۆی سەرۆک کۆماری بۆ ئەم کەرتە گرنگە کرد.

حەماس رەزامەندی نیشاندا بۆ ئازادكردنی سەرجەم بارمتە ئیسرائیلییەكان لە قۆناغی دووەمی ئاگربەستی غەززە و ئیسرائیلیش لێپرسینەوە لە پێنج سەرباز دەكات، لەسەر خراپ مامەڵەكردن لەگەڵ دیل و دەستگیراوە فەلەستینییەكان.

ئاژانسی فرانس پرێس بڵاویكردەوە، بزووتنەوەی حەماس رەزامەندی نیشانداوە، لە قۆناغی دووەمی ئاگربەستی غەززە، سەرجەم بارمتە ئیسرائیلییەكان بە یەكجار ئازاد بكات، بە پێچەوانەوەی قۆناغی یەكەم، كە هەر هەفتەیەك سێ بارمتەی ئازاد كردووە.

راشیگەیاندوە، بزوتنەوەی حەماس وڵاتانی نێوەندگیری لەو هەڵوێستەی ئاگاداركردووەتەوە.

سوپای ئیسرائیلیش رایگەیاند، لێپرسینەوەیان لەگەڵ پێنج سەربازی یەدەگی سوپا دەستپێكردووە، لەسەر خراپ مامەڵكردن و ئەشكەنجەدانی دیل و دەستگیركراوانی فەلەستین لە گرتووخانەی سەدی تیمان.

رۆژی 19ی مانگی رابردوو، ئاگربەستی غەززە لەنێوان ئیسرائیل و حەماس چووە بواری جێبەجێكردنەوە و تائێستاش، شەش جار لە رۆژانی شەممەی هەر هەفتەیەك ئاڵوگۆڕی بارمتە و دیلەكان لەنێوان هەردوولا ئەنجامدراوە و تائێستاش 19 بارمتەی ئیسرائیل لەبەرانبەر سەدان دیل و دەستگیركراوی فەلەستینی ئازادكراون.

بەهۆی نزمبوونەوەی بەرچاوی نرخی تمەنەوە، پەرلەمانی ئێران دەیەوێت متمانە لە وەزیری دارایی و ئابووری وڵاتەکەی بسەنێتەوە.

تەلەفزیۆنی رەسمی ئێران رایگەیاندووە، بەهۆی ئەو نمزبوونەوە بەرچاوەی تمەن بەرانبەر بە نرخی دۆلار دیویەتی، پەرلەمانی ئێران دەیەوێت لە دانیشتنی ئەمڕۆیدا عەبدولناسڕ هەمتی وەزیری دارایی و ئابووری ئێران لەسەر کار لاببات.

دانیشتنەکە کە لە کەناڵە تەلەفزیۆنییەکانیشەوە پەخشکرا، ئەحمەد نادری پەرلەمانتار ئەوەی خستە روو، پەرلەمان داواکاری پێگەیشتووە بۆ لێپرسینەوە لە وەزیری دارایی و ئابووری، کە رەنگە دانیشتنەکان بە لێسەندنەوەی متمانە لەو وەزیرە کۆتایی پێبێت.

بەپێی یاسای ئێران، ئەو وەزیرەی سکاڵای لەسەرە و داوادەکرێت لێپرسینەوەی لێبکرێت، مۆڵەتی 10 رۆژی لەبەردەمدایە بۆ ئامادەبوون لە پەرلەمان و وەڵامدانەوەی پرسیاری پەرلەمانتارەکان، کە پێویستە روونکردنەوەی تەواو بدات لەسەر دۆخی ئابووری وڵات، بەر لەوەی دەستبکرێت بە دەنگدان بۆ لێسەندنەوەی متمانە لێی.

دوای ئەوەی ساڵی 2018 دۆناڵد تڕەمپ لە رێککەوتنی ئەتۆمی ئێران کشایەوە، چەندین سزای بەسەر ئەو وڵاتەدا سەپاند و ئێران کەوتە ناو قەیرانێکی ئابووری قوڵەوە، بەهۆی سزاکانی ئەمریکاشەوە، ماوەی چەند ساڵێکە نرخی تمەن بەشێوەیەکی بەرچاو دابەزیوە، لەدوای رووخانی رژێمی بەشار ئەسەدیشەوە لە سوریا لە مانگی 12ی ساڵی رابردوودا، نرخی تمەن زیاتر رووی لە دابەزین کرد.

لە ئێستادا لە بازاڕەکانی هەرێم 100 دۆلار بەرانبەر بە نۆ ملیۆن و 300 هەزار تمەنە.

بەهۆی هێرشەكانی توركیا لە باكور و رۆژهەڵاتی سوریا 18 خوێندكار و مامۆستا شەهید بوون.

ئاژانسی هەواڵی هاوارنیوز بڵاوی كردوەتەوە بەهۆی هێرشەكانی توركیا لە دوو مانگی رابردوودا بۆسەر خوێندگە و شوێنی نیشتەجێبون لە كانتۆنی كۆبانێ و فورات 18 خوێندكار و مامۆستا شەهید بوون و هەشت كەسیشیان بریندار بووە.

دەستەی پەورەردە و فێركردنی خۆسەریی باكور و رۆژهەڵاتی سوریا رایگەیاندووە، لە ماوەی ئەو دوو مانگەدا سوپای توركیا و چەكدارانی هاوپەیمانی ژمارەیەك خوێندنگەیان لە كۆبانێ و كانتۆنەكانی فورات كردووەتە ئامانج بووەتە هۆی شەهیدبوونی مامۆستا و خوێندكاران.

دەستەكە ئاماژەی بەوە كردووە، بەهۆی هێرشی فڕۆكە جەنگییەكانی توركیا دوو خوێندگەی باشووری كۆبانێ بە تەواوەتی خاپور كراوە و ئەو وڵاتە بەبێ گوێدانە پێوەرە نێودەوڵەتی و مرۆییەكان دەست لە بینای خوێندگەكانیش ناپارێزێ.