ئەمڕۆ هاوسەرۆكانی دەمپارتی لەگەڵ سەرۆكی جەهەپە بۆ تاوتوێكردنی پرسی ئاشتی لە توركیا و باكوری كوردستان كۆدەبنەوە.

پەیامنێری كوردسات نیوز رایگەیاند، ئەمڕۆ تونجەر باقرهان و تولای هاتیمئۆغولاری هاوسەرۆكانی پارتی یەكسانی و دیموكراسی گەلان (دەمپارتی) لە ئەنكەرە لەگەڵ ئۆزگور ئۆزەل سەرۆكی پارتی گەلی كۆماری (جەهەپە) كۆدەبنەوە.

وتیشی، بڕیارە لە كۆبوونەوەكەدا پرسی ئاشتی و پرسی كورد لە توركیا و باكوری كوردستان تاوتوێ بكرێت.

ئەو كۆبوونەوەیەش لە كاتێكدایە كە رۆژی پێنجشەممە دەوڵەت بەخچەلی سەرۆكی پارتی بزوتنەوەی نەتەوەپەرستی توركیا (مەهەپە) لە كۆبوونەوەی پارتەكەی داوای لە دەمپارتی كرد سەردانی زیندانی ئیمراڵی بكەن و لەگەڵ عەبدوڵا ئۆجالان كۆببنەوە.

پێشتریش هاوسەرۆكانی دەمپارتی لە وەزارەتی دادی توركیا داوایەكیان پێشكەشكرد بۆ ئەنجامدانی دیدار لەگەڵ عەبدوڵا ئۆجالان.

شەڕ و پێكدادانەكانی نێوان سوپای سوریا و گروپە چەكدارەكانی نزیك لە توركیا لە ئیدلیب بەردەوامە كە بەهۆیەوە تائێستا زیاتر لە ٢٣٠ كەس لە هەردوولا كوژراون.

ئاژانسی هەواڵی فرانس پرێس بڵاویكردەوە، بەهۆی پێكدادانەكانی سوپای سوریا لەگەڵ چەكدارانی تەحریرشام لە رۆژهەڵاتی ئیدلیب زیاتر لە ٢٣٠ كەس لە هەردوولا كوژراون و ٢٠ كەسی مەدەنیش گیانیانلەدەستداوە، هەروەها ٣٢ گوندیش لەلایەن چەكدارانی تەحریرشام دەستیان بەسەرداگیراوە.

بەگوێرەی چەند سەرچاوەیەكیش، حكومەتی دیمەشق هێزێكی بە تانك و تۆپی گەڕۆك و هەروەها ئۆتۆمبێل بۆ گواستنەوەی سەربازەكان، لە دەوری باسل جێگیركردووە كە دەكەوێتە ڕۆژئاوای حەلەب و تۆپبارانی چەكدارانی نزیك لە توركیا دەكەن.

لە رۆژی ٢٧ی ئەم مانگەوە، سوپای سوریا ئۆپراسیۆنێكی سەربازیی لە باكوری رۆژئاوای سوریا دەستپێكردوە و سوپای روسیاش تێیدا بەشدارە و هاوكاریی رژێمی سوریا دەكات دژی گروپە چەكدارەكان.

وەزیری بەرگری روسیا بە سەردانێكی رەسمی گەیشتە كۆریای باكور و بڕیارە ژمارەیەك كۆبوونەوە لە پیۆنگیانگ ئەنجامبدات.

ئاندری بێلاسۆڤ وەزیری بەرگری روسیا لە فڕۆكەخانەی نێودەوڵەتی سونان لە پیۆنگیانگ لەلایەن جەنەڕاڵ نۆ گوانگ چول وەزیری بەرگری كۆریای باكورەوە پێشوازی لێكرا.

سەردانەكەی وەزیری بەرگری روسیا دوای ئەوە دێت، كە لە مانگی حوزەیرانی ڕابردوودا، ڤلادیمیر پوتن سەرۆكی روسیا سەردانێكی دوو رۆژەی بۆ كۆریای باكور ئەنجامدا.

ئەوەش لەكاتێكدایە كە روسیا لە جەنگێكی هەزار رۆژەدایە لەگەڵ ئۆكراین و مۆسكۆ هەمیشە دەوڵەتانی ناتۆ و ئەمریكا تۆمەتباردەكات بە پشتیوانی ئۆكراین.