کۆمپانیایەکی ژاپۆنی روونکردنەوە لەسەر تەقینەوەی ئامێرەکانی پەیوەندی لە لوبنان دەدات
مەریوان عەبدوڵا
کۆمپانیای "ئایکۆم"ی ژاپۆنی رایگەیاند، نزیکەی ١٠ ساڵە دروستکردنی ئەو ئامێرە پەیوەندییە بێتەلانەیان راگرتووە کە لە لوبنان تەقیونەتەوە، ئەوەش دوای ئەوەی راپۆرتە ھەواڵییەکان باسیان لەوەکرد ئامێرەکان ھێمای بازرگانی ئەو کۆمپانیایەیان لەسەرە.
کۆمپانیا ژاپۆنییەکە لە راگەیەندراوێکدا بڵاویکردەوە، ئامێری پەیوەندی بێتەل لە جۆری "ئەی سی ڤی ٨٢" لە ساڵانی ٢٠٠٤ بۆ ٢٠١٤ دروستدەکرا و ھەناردەی رۆژھەڵاتی ناوەڕاست دەکرا، بەڵام نزیکەی ١٠ ساڵە بەرھەمھێنانی ئەو ئامێرانە راگیراون و لەلایەن کۆمپانیاکەیانەوە بۆ ھیچ وڵاتێک نەنێردراون.
ئاماژە بەوەشکراوە، تەنانەت بەرھەمھێنانی پاتری ئەو جۆرە ئامێرانە راگیراوە و ھەر بەرھەمێکیان کە لە بازاڕەکاندا دەفرۆشرێن لەژێر رێکاری ئەمنی و بازرگانیدایە.
روونکردنەوەی کۆمپانیای ئایکۆمی ژاپۆنی دوای ئەوەھات کە لە دووەم تەقینەوەی ئامێرەکانی پەیوەندی بێتەل لە لوبنان، راپۆرتە ھەواڵییەکان باسیان لەوەدەکرد کە ئامێرەکان ھێمای بازرگانی ئەو کۆمپانیا ژاپۆنییەیان ھەڵگرتووە، کە بەھۆیەوە ٢٠ کەس کوژران و زیاتر لە ٤٥٠ کەسی دیکەش برینداربوون.
|