وەزیری دەرەوەی عێراق: ئۆپراسیۆنەکانی تورکیا لە ھەرێم بەبێ رەزامەندی بەغدادە

کوردسات نیوز

وەزیری دەرەوەی عێراق رایگەیاند، بەغداد ناتوانێت رێگە لە ھێرشی سەربازیی تورکیا بۆ سەر وڵاتەکەی بگرێت.

(فوئاد حسێن) وەزیری دەرەوەی عێراق لە لێدوانێکدا بۆ بەشی کوردی دەنگی ئەمریکا رایگەیاند، بەغداد توانای نییە بە چەک رێگری لە ھێرشی سەربازیی تورکیا بۆ سەر خاکەکەی بکات، دەشڵێت، عێراق بڕوای بەوە نییە بە ھێز لەبەرامبەر ھێزێکی تر بوەستێت، چونکە عێراق ھێشتا ماویەتی ببێتە خاوەنی دامەزراوەیەکی سەربازیی بەھێز کە بتوانێت بەرگری لە سەرەوەری خۆی بکات.
(فوئاد حسێن) ئاماژەی بۆ ئەوەشکردووە، ھێرشەکانی تورکیا بۆ سەر بنکە و بارەگاکانی پارتی کرێکارانی کوردستان لەناو سنوری ھەرێمی کوردستان بەبێ رەزامەندی بەغدادە و ھیچ رێککەوتنێکی دوو قۆڵیش نییە کە رێگە بە تورکیا بدات بێتە ناو خاکی عێراق بۆ ئەنجامدانی ئۆپراسیۆنی سەربازیی.