ڕوونکردنەوەیەک لە وەزارەتی داراییەوە لەبارەی موچەی فەرمانبەران
کوردسات نیوز
ئاوات شێخ جەناب وەزیری دارایی و ئابووریی هەرێمی كوردستان رایدەگەیەنێت، دەست بە دابەشكردنی مووچەی مانگی تەممووز دەكەن، بەڵام وادەی دابەشكردنەكەی دیارینەكرد، دەشڵێت، بەنیازن سەرجەم داهاتی ناوخۆ رادەستی بەغداد بكەن.
ئاوات شێخ جەناب، لە چاوپێكەوتنێكیدا لەگەڵ میدیای نزیك لە حزبەكەی رایگەیاند، ئەو پارەیەی لە بەغدادەوە بۆ هەرێمی كوردستان دێت، "تەموویل"ی شەش مانگی كۆتایی ئەمساڵ نییە، بەڵكو قەرزێكە و حكومەتی هەرێمیش ئازادە ئەو پارەیە بۆ چی مانگێك خەرجدەكات.
وتیشی، بە مووچەی مانگی تەممووز دەستپێدەكەن و دواتریش مووچەی مانگەكانی ئاب و ئەیلوول دابەش دەكەن، بۆ مووچەی مانگەكانی داهاتووش هەوڵدەدەن كێشەكان لەگەڵ وەزارەتی دارایی عێراق چارەسەر بكەن.
وەزیری دارایی راشیگەیاند، ئەوە لایەنەی پابەندی دەستوور و یاسا نەبووە، حكومەتی فیدڕاڵیی عێراقە، چونكە هەرێمی كوردستان هەموو پابەندییەكانی جێبەجێكردووە و بڕیاریانداوە و بەنیازن هەموو داهاتی ناوخۆی هەرێم، رادەستی بەغداد بكەن.
|