د. نەرمین مەعروف: کۆبوونەوەکانی لیژنەی دارایی لەبارەی بودجە بەردەوامن

25/05/2023
فۆتۆ: 
کوردسات نیوز

لیژنەی دارایی ئەنجومەنی نوێنەرانی عێراق لە ئامادەکردنی راپۆرتی کۆتایی خۆی لەسەر پڕۆژەیاسای بودجە نزیک دەبێتەوە، لەئێستاشدا تەنھا دوو ماددەی ماوە کە گفتوگۆی لەسەربکرێت کە ھەردوکیان پەیوەستن بە ھەرێمی کوردستانەوە.

د. نەرمین مەعروف، ئەندامی لیژنەی دارایی لە ئەنجومەنی نوێنەران بە کوردسات نیوزی راگەیاند، دوانیوەڕۆی ئەمڕۆ کۆبوونەوەکانی لیژنەی دارایی بۆ ئامادەکردنی راپۆرتی کۆتایی لەسەر پڕۆژەیاسای بودجە بەردەوام دەبێت.

ئەوەشی خستەڕوو، لەئێستادا ماددەی ١٣ و ١٤ی تایبەت بە شایستە داراییەکانی ھەرێم یەکلایینەکراونەتەوە کە تایبەتن بە میکانیزمی فرۆشتنی نەوتی ھەرێم و شێوازی مامەڵکردن لەگەڵ داھاتەکەی، ئەگەریش ئەو دوو برگەیە یەکلایی بکرێنەوە، رۆژانی شەممە یان یەکشەممەی داھاتوو ئەنجومەنی نوێنەران دەنگ لەسەر یاسای بودجە دەدات.

لای خۆیەوە محەمەد حەلبوسی سەرۆکی ئەنجومەنی نوێنەرانی عێراق رایگەیاند، پڕۆژەیاسای بودجە لە ساتەکانی کۆتاییدایە و ئەمڕۆ لیژنەی دارایی رەوانەی سەرۆکایەتی ئەنجومەنی نوێنەرانی دەکات و رۆژی شەممەش ئەنجومەنی نوێنەران دەنگ لەسەر پڕۆژەیاساکە دەدات.