لیژنەی دارایی دەنگ لەسەر ماددە و بڕگەکانی پرۆژەیاسای بودجە دەدات

21/05/2023
فۆتۆ: 
کوردسات نیوز

لیژنەی دارایی بڕگەیەکی تایبەت بە ھەرێمی کوردستانی لە پرۆژەیاسای بودجە پەسەندکرد و بڕگەکانی تریش بۆچوونی جیاوازیان لەسەرە.

د.نەرمین مەعروف ئەندامی لیژنەی دارایی لە ئەنجومەنی نوێنەرانی عێراق بە کوردسات نیوزی راگەیاند، کارەکانی ئێستای لیژنەی دارایی لەسەر پرۆژەیاسای بودجە گەیشتووەتە دەنگدان لەسەر بڕگە و ماددەکانی پرۆژەیاساکە و بەشێکی زۆریشیان تەواوکراون، تەنھا ھەندێ بیرۆکە و پێشنیاز ماون زیادبکرێن و پێشبینیش دەکەن بۆ کۆتایی ئەم ھەفتەیە رەشنووسی کۆتایی پرۆژەیاسای بودجە ئامادەبێت.

ئاماژەی بەوەشکرد، ماددەکانی ١٢ و ١٣ و ١٤ کە پەیوەندییان بە ھەرێمی کوردستانەوە ھەیە، ماددەی ١٢ دەنگی لەسەر دراوە، بەڵام بڕگەکانی ھەردوو ماددەی ١٣ و ١٤ بەشێکیان تەواوبوون و بەشێکیشیان بۆچوونی جیاوازیان لەسەرە و دەیانەوێت دوای تەواوکردنی ئەو دوو ماددەیە و پێش ئەوەی دەنگی لەسەر بدەن، جارێکی تر بۆچوونی ھەردوو حکومەتی ھەرێم و عێراقی لەسەر وەربگرن، چونکە وەک لیژنەی دارایی نایانەوێت کارێک بکەن پێچەوانەی رێککەوتنەکەی ھەرێم و بەغداد بێت.