بانکی رافیدەین بۆ لقەکانی: پێویستە رۆتینی کارگێڕیی کەمبکرێتەوە

14/03/2023
فۆتۆ: 
کوردسات نیوز

بانکی رافیدەین، سەرجەم لقەکانی لە بەغدا و پارێزگاکانی دیکەی عێراق ئاگاداردەکاتەوە، کە پێویستە رۆتینی کارگێڕی بۆ راییکردنی مامەڵەی ھاووڵاتیان بۆ کەمترین ئاست کەمبکرێتەوە و کارئاسانی تەواویش بکرێت بۆ ئەوەی بازرگانان لەرێگەی پەنجەرەی ئەلیکترۆنییەوە، بتوانن پارەکانیان ھاوردەی دەرەوەی وڵات بکەن.

بانکی رافیدەین، لە راگەیەنراوێکدا کە ئاڕاستەی سەرجەم لقەکانی لە بەغدا و پارێزگاکانی دیکە کردووە، ئەوەشی خستووەتەڕوو، پێویستە سەرجەم لقەکانی بانکی رافیدەین پابەندبن بە پێشکەشکردنی خزمەتگوزارییەکان بە ھاووڵاتیان بەشێوەیەک رۆتینی کارگێڕی کەمبکرێتەوە و رێکاری ئاسان بۆ راییکردنی مامەڵەی خەڵک جێبەجێبکرێت.

باسی لەوەشکردووە، بڕیارەکە لە چوارچێوەی ھەوڵەکاندایە بۆ گەشەپێدانی کەرتی بانکی و بە ئەلیکترۆنیکردنی خزمەتگوزارییەکان لەگەڵ رەچاوکردنی ئاستەنگییەکان کە لەم خزمەتگوزارییەدا دێنەپێش.

لەبارەی مامەڵەی بازرگانان و پەنجەرەی ئەلیکترۆنیشەوە، بانکی رافیدەین لە بڕیارەکەیدا دەڵێت، پێویستە ئەوانەی بازرگانن و کاڵا ھاوردەی عێراق دەکەن بەخێرایی کارەکانیان راییبکرێت و لەرێگەی پەنجەرەی ئەلیکترۆنییەوە کە بانکی ناوەندی چاودێری و سەرپەرشتی دەکات، پارەکانیان بۆ دەرەوەی وڵات بۆ بگوازرێتەوە.