وردەکاریی پڕۆژەیاسای بودجەی عێراق و پشکی ھەرێم

13/03/2023
فۆتۆ: 
کوردسات نیوز

ئەنجومەنی وەزیرانی عێراق پرۆژەیاسای بودجەی سێ ساڵی پەسەندکرد و رەوانەی ئەنجومەنی نوێنەرانی کرد بۆ پەسەندکردنی، محەمەد شیاع سودانیش دەڵێت پشکی ھەرێم لە بودجە بە ١٢.٦٪ دیاریکراوە

ئاژانسی فەرمی عێراق بڵاویکردەوە، لە کۆبوونەوەی ئەنجومەنی وەزیرانی عێراقدا بە سەرۆکایەتی محەمەد شیاع سودانی سەرۆک وەزیران، پرۆژەیاسای بودجە بۆ ساڵەکانی ٢٠٢٣و ٢٠٢٤و ٢٠٢٥ پەسەندکراون.

ئاماژە بەوەشکراوە، پڕۆژە یاسای بودجە راستەوخۆ رەوانەی ئەنجومەنی نوێنەرانی عێراق کرا بۆ پەسەندکردنی.

بەپێی زانیارییەکانی کوردسات نیوز، قەبارەی بودجەی عێراق ١٩٧ ترلیۆن و ٨٢٨ ملیار دینارە و ٦٣ ترلیۆنیش کورتھێنانی ھەیە، پشکی ھەرێم بە لەسەدا ١٢.٦٧ دیاریکراوە.

ھەر بەپێی پڕۆژەکە، تێکڕای داھاتی نەوتی ھەرێم دەچێتە حسابێکی بانکییەوە لەژێر چاودێری سەرۆک وەزیرانی عێراق و حکومەتی ھەرێم دەبێت داھاتی ٤٠٠ ھەزار بەرمیل نەوتی رۆژانە رادەستی بەغداد بکات.

لە پڕۆژەی بودجەدا بودجەی بەکاربردن بە ١٥٠ ترلیۆن و ٢٩٣ ملیار دینار، بودجەی وەبەرھێنانیش بە ٤٧ ترلیۆن و ٥٥٥ ملیار دینار دیاریکراوە، ھەروەھا داھاتی نەوت بە ١١٧ ترلیۆن و ٢٥٢ ملیار دینار دیاریکراوە.

ھەر لە پڕۆژەکەدا نرخی نەوت بە ٧٠ دۆلار دیاریکراوە، ھەروەھا ٥٠ ملیار دینار بۆ ئاوەدانکردنەوەی شەنگال و دەوروبەری نەینەوا دیاریکراوە.