بۆ ١٣ ھەمین رۆژ تۆپخانەکانی ئێران سنوری برادۆستیان تۆپباران کرد
کوردسات نیوز
بۆ ١٣ ھەمین رۆژ لەسەریەک، تۆپخانەکانی کۆماری ئیسلامی ئێران سنوری برادۆستیان تۆپباران کردەوە، ئەوەش وایکردووە دانیشتووانی ھەشت گوندی سنورەکە نەتوانن بگەڕێنەوە سەر ماڵ و حاڵی خۆیان.
پەیامنێری کوردسات نیوز رایگەیاند، لە بەردەوامیی تۆپبارانەکانی ئێراندا، بەیانی ئەمرۆ تۆپخانەکانی ئێران ناوچەکانی " ناوروبارا و گواراسایە و گوندی کەتینە"ی سنوری برادۆستیان تۆپباران کردووە.
وتیشی، تۆپبارانەکانی ئێران ترس و دڵەڕاوکێی خستووەتە ناو خەڵکەوە و زیانی زۆریش بەر رەز و باخی ھاوڵاتیان کەتووە.
لە ماوەی ١٣ رۆژی رابردوودا، ئێران بە بەردەوامی ھەشت گوندی سنوری برادۆستی تۆپباران کردووە کە بەو ھۆیەوە دانیشتوانی ئەو گوندانە ئاوارەبوون و ھاوکات نزیکەی ٥٠٠ جوتیاری سنورەکەش زیانی ماددیان پێگەیشتووە و ناتوانن بچنە سەر کێڵگە و زەوییە کشتوکاڵییەکانیان، دوو خوێندنگەش داخراون و زیاتر لە ٥٠ خوێندکاریش لە خوێندن دابڕاون .
|