تەقە لە بانکی چەمچەماڵ کرا

29/09/2022
فۆتۆ: 
کوردسات نیوز

لە کاتی وەرگرتنی مووچەدا لە بانکی چەمچەماڵ گرژی و ئاڵۆزی دروستبوو، بەھۆیەوە ئەفسەرێکی پێشمەرگە دەستڕێژی گولـلەی لە بانکەکە کرد و سەرچاوەیەکیش لە پۆلیسی چەمچەماڵ ئاشکرایکرد، سەرجەم ئەو کەسانەی گرژیان لە بانکی چەمچەماڵ دروستکردبوو دەسگیرکران.

پەیامنێری کوردسات نیوز راگەیاند، لەکاتی وەرگرتنی مووچە گرژی و ئاڵۆزی لە نێوان دوو ئەفسەری لیواکان لە بانکی چەمچەماڵ دروستبوو و پاشان یەکێک لە ئەفسەرەکان دەستڕێژی گولـلەی لە بانکەکە کردووە.

وتیشی، بەھۆی تەقەکردنەوەکەوە ھیچ کەسێک بریندار نەبووە، بەڵام زیان بەر بینای بانکەکە کەوتووە.

پەیامنێری کوردسات نیوز ئاماژەی بەشکرد، لە دوای تەقەکردنەکە کارمەندەکانی بانکی چەمچەماڵ دەستیان لە کارھەڵگرت و داوایان کرد لێپێچینەوە لەگەڵ ئەو ئەفسەر و پێشمەرگەنەدا بکرێت دەمەقاڵێ و دەستڕێژی گولـلەیان کردووە.

سەرچاوەیەکیش لە پۆلیسی چەمچەماڵ بە کوردسات نیوزی راگەیاند، سەرجەم ئەو ئەفسەر و پیشمەرگەنەی لە بانکی چەمچەماڵ گرژیان دروستکردووە و ئەو ئەفەسەرەشی تەقەی کردووە دەستگیرکراون.